Nongpoh, Rymphang 20 : Ha kawei ka jingjia ba ishyrkhei, uwei u Khynnah ba 10 snem, ula shah pyniap dusmon khlem ka jingisynei shuh ha ki runar hapoh ka shnong Umtangar, kaba hap hapoh ka Patharkhmah Police Station, Ri-Bhoi.
Kane ka jingjia kala jia ha ka miet sngi u Blei por 7 baje eiei bad ia ka metiap une u Khynnah la lap na kawei ka khlaw kaba don marjan ka iingsah jong u ha Umtangar.
Une u Khynnah u kyrteng u Kitborlang Marbaniang, khun jong ka kong Diano Marbaniang bad Bah Synshar Nonghyndah. Une u Heprit u don hynriew ngut shipara kyntup iwei I Kynthei bad u dei u Khun ba saw jong ka Iing.
Haba pyntip ia kane ka jingjia, ki Pulit ki iathuh ba u Kitborlang ula leitkai badla ki jong ki paralok ha ka sngi Saitjain hynrei ula jah bad khlem wan phai iing shuh. Hadien ia ka met la lap na kawei ka khlaw bad la suba jur ba ula shah pyniap lyngba ki dak mong ha ki bynta jong ka khlieh bad ka durkhmat.
Ki Pulit ka Patharkhmah haba ioh jingtip, kila leit wut wut sha kane ka jaka ban tohkit bad hadien kila pynkit noh ia ka met sha Civil Hospital, Nongpoh ban pyndep ia ka post mortem. Ia ka met la aiti noh sha ki bahaiing ba kin pyndep ia ka lehniam leh rukom ba khatduh.
Ki bahaiing kila leit ujor da ka ejahar halor kane ka jingjia ha Patharkhmah Police Station bad ka jingtohkit mynta kala iaid shakhmat ban lapdien ia ki briew kiba donkti ban pyniap ia une u khynnah.
Ki Pulit kila rah ia ki katto katne ki briew ba ki suba ban pynlong ia ka jingtohkit.
