Shillong, Rymphang 19: ‘Ka Chithi’, ka phlim kaba la shna (direct) da ka kong Simi Khongtiang, kala shah jied ban pyni nam ha ka 15th Bengaluru International Film Festival 2024.
Ka phlim ‘Ka Chithi’ kala kylla long ka phlim Jaintia kaba nyngkong eh kaban shah jied ban pyninam ha kum katei ka rynsan kaba pawnam.
Ka Bengaluru International Film Festival ka dei kaba la paw bha ha kaban pyninam ia ki phlim kiba la pynmih ha kylleng satlak jong ka pyrthei bad ka phlim “Ka Chithi” kan iakhun ruh ha ka kyrdan Indian Competition Section, ryngkat bad ki 11 tylli ki phlim kiba la pynmih ha kylleng jong ka ri India.
Kane ka Film Festival kan sdang ha ka 29 tarik u Rymphang bad kan kut ha ka 7 tarik u Lber 2024 bad kane ka Festival kadei kaba lum lang ia baroh ki nongshna phlim na kylleng ki ri bad la khmih lynti ba ka phlim ‘Ka Chithi’ kan khring bad pynshohbiej ia ki nongiashimbynta ha katei ka festival ban sakhi ia ka jingriewspah jong ka kolshor ki jaidbynriew Jaintia.
Ia ka phlim “Ka Chithi,” yn pyni ha ryngkat bad ar tylli ki phlim na ka thain shatei lam mihngi kiba kynthup iaka “Joseph’s Son” na Manipur kaba la direct da u Haobam Paban Kumar bad ka “Samparpan” na Assam kaba la direct da u Arup Manna.
Ka AntHill Productions bad ka Director jong ‘Ka Chithi’ ka Kong Simi Khongtiang kala ai khublei ia ki tynshop ki puron bad ia baroh kiba don bynta ha ka phlim ‘Ka Chithi,’ bad kumjuh ia ki nongieid phlim ka thaiñ khamtam eh ia kiba na rilum Jaintia.
