Shillong, Rymphang 17: U Myntri Rangbah ka jylla u Conrad K. Sangma hynne ka sngi Saitjain ula ong, ba ka jylla ka donkam ban kynjoh sha ka 11.5 percent ka jingkiew ha ka (GDP) ban pynurlong iaka jingthmu ban kynjoh ia ka ioh ka kot sha ka 10 Billion US Dollar hapoh u snem 2028.
Laid foundation for the ‘Bulk Water Supply to Adjoining Rural Villages of Tura Town’ Project funded under NESIDS. This is a river pumping scheme from Ganol river which will give adequate supply of water to villages under Rongram, Rerapara and Gambegre development blocks of West… pic.twitter.com/J0iJvxSHEz
— Conrad K Sangma (@SangmaConrad) February 17, 2024
“Kumba long mynta, ka ioh ka kot jong ka jylla ka long 45,000 Klur ia kaba dang donkam ban lehbha shuh shuh. Ka long ka kam kaba khraw hynrei kum ka sorkar, ngi la pynkhreh ia ka lynti iaid ban pynurlong ia katei ka thong” ong u Conrad ha ka jingbuh mawnongrim ia ka Bulk Water Supply Project ha Ballonggre, Tura kaba T.100 Klur.
Ha kane ka jingbuh mawnongrim la iadonlang u Lamphang ka iingdorbar thawain ka jylla u Thomas Sangma, u Myntri ka tnad PHE u Marcuise Marak bad ka MP Lok Sabha ka Agatha K. Sangma.
La mang ia katei ka projek ban pynlut kumba T.100 Klur ia kaba la bei tyngka da ka Ministry of DoNER lyngba ka North East Special Infrastructure Development Scheme (NESIDS). Tang shu dep tei ia kane ka projek, kan sam um sha ki 14 tylli ki shnong kiba hap ha ka Rongram, Rerapara bad Gambegre Block jongka West bad South West Garo Hills district bad kan kyntiew ruh iaka jingsam um ha ka sor Tura.
Namar ka jingbym don katei ka projek, kitei ki shnong ki shaniah tang na ka Tura Urban Water Supply Scheme bad ia kane ka projek yn tan um na ka Wah Ganol ha kaba yn tei ia ka Pump House, Reservoir, Treatment Plant, Water Pumping, ka Staff Quarter bad kiwei kiwei.
Ula ong, ba ka sorkar kala don ia ka jingiohi jngai na ka bynta ka jylla bad kumta kala bhah ia ka tyngka bad ka jingbhah tyngka kadei naka bynta ban thaw ia ki jingtei kiba bha bad kiban iai neh, ban thaw ia ka lad aikam lyngba ka jingseng kam lajong bad ki polisi kiba kyrpang bad ki prokram kiban kyntiew arshah ia ka kamai kajih jong ki nongrep.
Ula pyntip ba la ailad ban kyntiew iaka ioh ka kot ha baroh ki liang ha ka thaiñ nongkyndong da kaba pynleit jingmut ha ki kam kiban kyntiew ia ki jngdon jingem kiba riewspah jong ka jylla.
Haba kren halor ka jingbym lah ban lehbha ka jylla ha kiba bun ki liang, ula ong ba ha ki 5 snem kiba la leit, ka sorkar MDA kala lah ban shimkhia ia kiba bun ki jingeh.
Ula ong ba ka Meghalaya kala iaid shakhmat bad kala ioh ia ka jngithuh kum ka ‘Best Performer’ ha ka jingpyntreikam ia ki skhim bapher jong ka sorkar pdeng kiba kynthup ia ka PMGSY, PMAY, JJM, MGNREGS bad kala ioh pdiang ia ki khusnam bad la ioh shuh shuh iaka pisa.
“Shwa u 2019, ka jingbhah tyngka ia ka tnad PHE ka long tang hapoh ka T.50 Klur, hynrei mynta la kyntiew ia ka jingbhah tyngka sha ka T.3000 Klur bad ka jingpynleit jingmut ka long ban tei ia ki jingtei kiban lah ban weng ia ki jingeh bad jingtynjuh ha kaba iadei bad ka jingbym biang ka umbam umdih” ula ong bad ka pyntip ba ka State Water Policy bad kiwei kiwei ki skhim kin shimkhia ruh ha kaba iadei bad ka jingkylla ka suinbneng.
Haba plie ia ka MegARISE ha Tura, ka projek kaba pynleit jingmut ha kaban iada ia ki jaka kiba don ki tyllong um ne ki catchment area ha ka jylla, u Myntri Rangbah ula ong “Kane ka projek ka pynleit jingmut ha kaban iada ia ki tyllong um jong ka Wah Umiew ha East Khasi Hills District bad ia ka Wah Ganol ha West Garo Hills district. Kine ki catchment area ki long kum kiba ai jingim na ka bynta ka nongbah Shillong bad Tura.
Ula pyntip ba ka sorkar jylla kala iatreilang bad ka KfW (German Development Bank) ban pyntreikam ia katei ka projek bad kane ka projek kan ai jingmyntoi ia ki 106 tylli ki shnong kiba don hajan jong ka catchment area.
Ia kane ka projek yn pyntreikam na ka bynta 7 snem ha kaba ka jingbhah tyngka kan kot sha ka T.344 Klur bad yn pyntreikam da ka Meghalaya Basin Development Authority (MBDA).
