Shillong, Rymphang 17: U MLA ka South Shillong Constituency u Bah Sanbor Shullai hynne ka sngi Saitjaiñ ula pynbna ba la mang T.3.61 klur ban tei ia ka jingkieng na sha lyndet jong ka Rhino Museum, Rilbong kaban pyniasoh bad ka shnong Kenches Traces Laban bad ka surok PWD Road ha Umshyrpi.
Nalor ka jingkieng, u Bah Sanbor ula pyntip ruh ba la mang T.2.34 klur ban tei Aqueduct Channel lane nala um ban thep ia ki pipe um kaban sdang naduh na Kench’s Trace ne Lumshatsngi shaduh Bathesda Home.
Haba iadei bad kine ki Project, hynne ka sngi u Bah Sanbor ula pynlong ruh ka jingjurip haki bynta ba don kine ki Project bad ha kane ka sngi la synran lang ki ophisar ka PWD, Station Commander, Shillong Cantonment Board bad ki nongialam shnong.
Haba kren sha ki lad pathai khubor u Bah Sanbor Shullai ula iathuh ba kala shim por kumba 8 bnai tam ban ioh jingbit naka tnad Defence ban ioh jaka marjan bad ka Rhino Museum namar ki don bun ki jyrwit jyrwat haba iadei bad ka jingshim jaka na ki shipai.
“Ban ioh jaka na ki shipai, nga la leit sha Delhi ban ioh jingbit na ka Defence Ministry ban shim ka jaka shipai marjan bad ka Rhino Museum ban tei da ka jingkieng ban pyniasoh iaka Kenches Trace sha Umshyrpi” la ong u Bah Sanbor.
U Bah Sanbor ula iathuh ba ka tnat PWD ka hap ban siew T.1.69 lak sha ki shipai ban ioh iaka jaka bad na ka liang ki shipai kila dep ruh ban pynkhreh ia ka detail project report (DPR) ban sdang tei noh ia ka jingkieng.
Ula pyntip ba kane ka jingkieng kan ai jingmyntoi ia baroh ki nongshong shnong ka Raid Laban namar ki paidbah kin ioh ban pyndonkam ia ka surok kaban mih shaduh Umshyrpi khamtam haka por ba jur ka dheng kali.
Haba iadei bad ka jingshna iaka Aqueduct Channel lane ki nala um, u Bah Sanbor ula iathuh ba ka jingpyntrei ka kynthup ban tih ka nala kaba jrong 3 phut ban thep iaki pipe um namar kane ka buit kan iarap ruh ban pynheh iaki bynta jong ka surok ka ban pyniasoh ia ka Lumshatsngi bad ka Kenches Traces.
