Shillong, Rymphang 17: Ka KSU Mawlai Umrynjah Unit ha ka sngi Thohdieng, kala ai jingiarap ia ki khynnah pule kiba wan na ki longiing ba duna ka ioh ka kot, kiba sah ha ka shnong Umrynjah.
Ki nongialam ka KSU Mawlai Circle bad ka KSU Umrynjah Unit kila sam ia ki kopi, let, khulom, robal bad ki Instrument Box sha ki 60 ngut ki khynnah pule khnang ba kin ioh ban pyndonkam ha ka jingpule ka jong ki.
U Publicity Secretary ka KSU Mawlai Circle u samla Gary Mawlieh ula pynpaw ba ki nongialam ka KSU ki dapda ka jingbynniaw halor ka jingbym lah ka sorkar ban pynbiang ki tiar skul shimet ia ki khynnah skul bad kumta ka seng kam banse ban ai ka jingshakri wat la ka long kaba rit.
Ula ong, ka KSU ka ngeit skhem ba kine ki khynnah pule kin ym iehnoh ia la ki jingpule hynrei kin minot thop khnang ba ha ki snem kiban wan, kin sa long ki khlur ba tyngshaiñ jong ka Jaidbynriew bad ka ngeit skhem ruh ba lyngba kane ka sienjam yn lah ban rat dyngkhong ia ka jingieh noh shiteng por jong ki khynnah ia ka jingpule ka jongki.
