Pruid dap u Lat ia ka thong ka Jylla ban kot ia 10 bn US dollar economy
Shillong, Rymphang 16 : U Lat ka Jylla Phagu Chauhan ha ka sngi Thohdieng, ula ong ba ka Sorkar Jylla kala buh ia ka thong ba angnud ban pynlong ia ka Jylla Meghalaya ka 10 billion UD dollar economy hapoh u 2028, kaban kyntiew arshah laishah ia ka GDP jong ka Jylla.
“Ki kam kum ha ki jingtei, ka bording, ka jingsam umbam, ka jingpynshlur ia ki jingseng kam, ka IT, ka kam jngoh kai bad ka rep ka riang kin dei ki kam kiban kyntiew ia ka ioh ka kot bad kaba donkam ban kynjoh ia kata ka thong” ong u Chauhan haba ai jingkren da ka Hindi ha ka sngi sdang jong ka Dorbar Mang Tyngka ka Jylla.
Ka Policy ka Sorkar ia ki Nongrep
Haba kren halor ki Policy jong ka Sorkar MDA, u Lat ula ong ba ka Jylla ka kwah ban kyntiew arshah ia ka kamai ka kajih jong ki nongrep da kaba shim kabu ia ka jinglong ka suin bneng kaba pher hangne bad da kaba pynkhlain bad wanrah ia ki lad ban pynmih ruh ia kiwei kiwei ki mar bam na ki marrep ba ki pynmih.
Halor kane, ka Sorkar kala buh hakhmat eh ia ki sienjam ban kyrshan ia ki nongrep ba rep ia ki mar ba shongdor bha kum u shynrai, sying, sohniamtra, sohtrun, ki kynbat, ki musla bad ka ngap da ka mission mode. Hapoh kine ki Mission, ki nongrep kila ioh ia ki tiar rep, jinghikai, ki jingtei ban shna ia ki jaka pynmih mar na ki marrep bad ka jingpyniasoh ia ka iew ka hat. Haduh mynta, kine ki Mission kila iarap haduh 13 ngut ki nongrep ban kyntiew ia ka kamai ka kajih jong ki.
Ki jingkyrshan ka Sorkar ia ki Nongri jingri
U Chauhan ula pyntip ba ka Sorkar kala kynshew pisa bun bha ha ka kam ri jingri ban pyni ja ia ki paidbah ha Nongkyndong bad ban pynkhlain ia ka jingpynmih dud bad ka doh ban bam.
U ong, ka Sorkar hapoh ka CM-Elevate kala ai 50% ka subsidy ia ki unit ban buh sem sniang, ri blang bad ri syiar. Hapoh ka Pigeery Mission, haduh 367 tylli ki cooperative society la dep ban thaw bad kiba la ri mynta ia palat 6000 tylli ki sniang kha khun. Palat 1000 ngut ki nongrep ba pynmih dud kila ioh ia ka ram ba khlem sut na ka Meghalaya Milk Mission.
Haba pynpaw ba ka jingpynmih dohkha ha Jylla kala kiew da 1139 metric ton ha u 2023 kaba la kynjoh mynta haduh 19,374 metric ton, u Lat ula ong baka Jylla kala nang jam sha u pud ban pynduna ia ka jingwanrah dohkha na shabar ka Jylla da kaba wanrah ia ki jaka pynkha pylleng kum ka Recirculatory Aquaculture System bad Integrated Cage Culture.
Kynjoh ka Jylla haduh 50% ka jingduna ki longkmie ba iap kha khun
Haba phai sha ka koit ka khiah, u Chauhan ula ong ba ki dak ki shin na ki jaka sumar ka Sorkar kila pyni ia ka jingjanai ha ka rukom ai jingsumar ha kine ki khyndiat snem bala leit. Ka Jylla kala sahi ia 50% ka jingduna ha ka jingiap jong ki longkmie ba kha khun da ka jingwan ka Sorkar ia ka Chief Minister’s Safe Motherhood Scheme.
U Lat ula ong ruh b aka jingpynkhlain ia ka jingdon ki nongai jingsumar ha Jylla, ka Medical Recruitment Board kala dep thungkam haduh 47% ia ki doktor tang hapoh ka shisnem. Ka Sorkar kala pynlut palat ia ka T.6 klur lyngba ki 6500 tylli ki Village Health Council ban pynkhlain ia ki lad ai jingsumar ha ki shnong ki thaw da ka jingiatrei ryngkat bad ki Dorbar Shnong.
Buhthong ka Sorkar ban pynioh ia ka pule dangle ba kynsai ha Jylla baroh kawei
Haba ban jur baka Sorkar ka dang don ia ka jingmut kaba skhem ban pynioh ia ka pule ka dangle kaba kynsai ha baroh ki kyrdan, u Lat ka Jylla ula ong ba ka Sorkar mynta ka dang kyntiew kyrdan bad shna pynbna ia baroh ki Iingskul kiba don hapoh ka Jylla.
“208 tylli ki Elementary, Secondary bad Higher Secondary school kila iaid hapoh ka Phase-I. 111 tylli ki skul kin hap hapoh ka Phase-II bad sa 1725 tylli kin hap ha ka Phase-III. Ka kam thungkam ia ki nonghikai skul LP bala sahteng la slem bah ruh ka dei kaba la dep ban leh mynta dang shen” ula ong haba bynrap ba haduh 996 ngut ki nonghikai ba dang thungkam thymmai kila ioh ia ki shithi thungkam ha ka prokram kaba long ha Tura bad Shillong.
Ha ka liang ka Higher Education, ula ong ba ka Sorkar kala plie ia ka Shillong Government College of Engineering ha u snem bala lah bad kan sdang noh shen ban pdiang noh ia ki samla pule. “Ka College of Architecture bad Urban Planning ha Ture ruh kan sa dep noh mynta u snem. Ka Sorkar kala pynkylla ia ka Captain Williamson Sangma Technical University Act ban pynkylla sha ka State University khnang ba ki College ka Jylla ki lah ban pyniasoh. Kane kan dei ka State University ba nyngkong eh ha Jylla Meghalaya” ula ong.
Da ka Skill Meghalaya yn thaw lad ban pyniohkam ia ki samla
Haba kren ia ka lad aikam aijam, u Lat ula ong ba ka Sorkar ka angnud ban ai jinghikai pyntbit ia 1.5 lak ngut ki samla ha ki sap iohkam kaba ki don ha kine ki 5 snem ban wan lyngba ka Skill Meghalaya Programme. Dang shen kala iaid ka jingai jinghikai pyntbit ia ki nos ki ban sa iohkam ha ki ri ba riewspah ka pyrthei kum ka Japan, Singapire bad ka United Kingdon.
Haduh 74% ki Iing ha Meghalaya kila ioh kor um iing
U Lat ula pyntip ba haduh mynta 4.8 lak tylli ki Longiing ka Jylla kila ioh ia ka kor um iing lyngba ka Jal Jeevan Mission, kaba kot haduh 74% ka jingtreikam bad kaba long halor ka national average.
U iathuh ba nalor ki Longiing, haduh 66% ki skul, 66% ki Anganwadi Centre bad 71 % ki PHC kila ioh ia ka umbam umdih na ka Sorkar Jylla. Palat 1000 tylli ki Shnong ha Jylla kila ioh syrnot kum ki “Har Ghar Jal’. Haduh 5467 tylli ki Shnong ki dei kiba la ithuh kum ki shnong bym leit painkhana shuh sharud shakiar hapoh ka Swachh Bharat Mission (Gramin) Program. Ka Sorkar ka buh ia ka thong ban pynlong ia baroh ki Shnong ka Jylla kum ki shnong ki bym leit painkhana shuh sha khlaw sha btap ne sha rud sha kiar hapoh une u snem ba mynta.
Nalor kane, u Chaujan ula ong ba ka Sorkar kala shim ruh ia shibun ki sienjam ban pynheh ia ki kad liengsuin kiba don ha Jylla. U ong ba ka Shillong ka dei kaba la pyniasoh liengsuin mynta haduh 8 tylli ki Sorbah jong ka Ri India.
Ka New Shillong Township
Halor ka rai jong ka Sorkar ban tei noh ia ka New Shillong Township, u Chauhan ula ong ba kane hi kan iaid ha ki artylli ki bynta. Ka bynta ba nyngkong ka long ban tei ia ka Administrative City ha Mawdiangdiang bad kaba ar pat ka dei ka jingtei ia ka Knowledge City ha Mawkhanu kaba dang iaid mynta ha ka jingiaphylliew jingmut.
Kum shibynta na ka plan ban pynbiang ia ki lad pyniasoh jong ka New Shillong, ka Sorkar kala shna mynta ia 3 tylli ki syrok ba pyniasoh ia ka New Shillong, sor Shillong bad ka Shillong Bypass. Kum kane kajuh ka plan la pynkhreh ruh mynta ia ka Tura bad Jowai.
