Shillong, Rymphang 16: U Lat ka Jylla Phagu Chauhan hynne ka sngi Thohdieng, ula pynsha-iong ia ka Iingdorbar Thaw Ain ka Jylla da kaba kren katto katne kyntien ha ka ktien Khasi haba ai jingkren sdang shuwa ban ai jingkren sha ki Dkhot ka Iingdorbar da ka ktien Hindi, ha ka sngi sdang jong ka Dorbar Mang Tyngka.
U Lat ka Jylla ula ai khublei ia ki Dkhot ka Iingdorbar da kaba ong “Nga ai Khublei ia phi baroh kiba don ha kane ka Por”.
Mynshem snem, ki 4 ngut ki MLA ka liang Pyrshha Voice of the People Party (VPP) kila mih jyndat napoh ka Iingdorbar kum ka jingpyrshah ia u Chauhan ba u ai jingkren da ka ktien Hindi.
Mynta u snem ruh, ka VPP kala byrngem ban nym iashimbynta ha ka por ai jingkren u Lat lada u kren da ka ktien Hindi khlem da buh ia u nongpynkylla ktien. Hynrei ka Assembly Secretariat kala leh iaba donkam da kaba pynbiang ia ka jingdawa ka VPP.
Hynrei u Lat ka Jylla ula kren lyngkot noh ia ki jingkren jong u namar ka jingbym don ha ka met kaba koit ba khlain.
U Lamphang ka Iingdorbar Thomas A Sangma ula ong ba u Lat ka Jylla u hap ban pynlyngkot noh ia ka jingkren namar ba um lah bha ban kren na ka daw ka jingshitom ha ka met.
“Ia kane la ju leh haba ym shait ym khlain bad naba ka Ophis u Lat kala kyrpad ban ban shim ia ka jingkren u Lat bala sam sha ka Iingdorbar kum kaba la pule” ula ong.
U Lamphang ula pynbna ruh ia ka rai ban sdang noh ia ka jingpynkylla ktien markhmat da u briew na ka ktien Khasi, Garo bad Jaintia sha ka English ha kawei pat ka Dorbar ban wan jong ka Iingdorbar.
