Shillong, Rymphang 15 : Ka Jylla Meghalaya kan sa sakhi shen ia ka jingtih dewiong da ki kor ki bor jong ka stad saian ha ka dur jong ka “Progressive Open Cast Mining”.
Kane kala mih hadien ba ka Ministry of Coal dang shen kala ai jingmynjur ia ki mining plan jong ki saw tylli ki project bala tyrwa napoh ka Jylla.
Ki 4 ngut kiba aplai ki dei u Bah Nehlang Lyngdoh (Rymbai Synrang Shahkhain Village East Jaintia Hills District, Maksing Sibren (Nongbri Nongkulang Village Ranikor C&RD Block South West Khasi Hills District), Thomas Nongtdu (Byndihati Village East Jaintia Hills District), Wenni Diengngan (Sdaddkhar village, West Khasi Hills District).
Ka sienjam ba donkam ban shim da kine ki 4 ngut ka long ba kin aplai ia ka environmental clearance, kaba long kongsan hapoh ka Environment Impact Assessment (EIA) notification u snem 2006.
Baroh ki Jylla hapoh ka Ri ki hap ban don ia ka State Expert Appraisal Committee on Environment (SEACE) bad ka State Environment Impact Assessment Authority (SEIAA).
U Chairman ka SEACE Naba Bhattacharjee ha ka sngi Balang ula pyntip ia ki nongthoh khubor b aka SEACE kan sa phah shen ia ki kyndon sha baroh ki 4 ngut ki nongaplai ia ki project ba kin pynkhreh ia ka Environment Impact Assessment (EIA) bad Environment Management Plan (EMP).
Kine ki artylli ki report ki dei iakaban hap pynkhreh da ki nongaplai ia ka project lyngba ki Consultant bala ithuh, kiba la buh ban leh ia ki project dewiong.
“Ngin sa pynmih noh ia ki kyndon haba kut jong une u bnai na ka bynta ka jingpynkhreh ia ka EIA bad EMP” ong u Naba haba bynrap ba kiba bun ki bynta jong ka EIA bad EMP ka long ban pynlong iaka public hearing na ka bynta ki project,ia kaba yn sa pynbna da ka Pollution Control Board.
