Nongpoh, Rymphang 15: Kawei ka Longkmie kala iap hashen na ka jingshah lympat bording elektrik katba ka dang leit wad jhur khlaw na kawei ka khlaw ba marjan bad ka shnong Umran Dairy.
Kane ka jingjia kala ha ka sngi Ba-ar bad la iathuh ba kane ka Longkmie kala leit wad jhur khlaw bad la ka jong ka Khun.
Kane ka Longkmie ka kyrteng ka kong Edwina Lyngdoh Lyngkhoi ba 52 snem ka rta, kaba shong ba sah ha Umran Dairy bad ka Khun.
Kat kum ka jingiathuh ki trai shnong, kane ka Longkmie ka dei kaba duk ba rangli bad kaba ju im da kaba leit wad ia ki jhur khlaw ban pyndap pynbiang iala ka iing ka sem.
Hynrei ha kane ka sngi, katba ka dang leit wad jhur bad la ka khun, kala leit kum iuh ia u sainar elektrik uba la dkut bad thiah lyngktar ha madan bad uba dang don bording. Ka bording kala lympat ia kane ka longkmie haduh ba kan da duh iala ka jingim.
Kane ka Khun haba iakren bad Ka Shlem ka iathuh ba katba ka dang wad jhur khlaw, kala iohsngew kynsan ia ka jingsawa bad kala mareh ban leit peit pynban, kala lap iala ka jong ka Kmie ba kala shah bat bording bad kumta mar mar kala ialeh ban pyrta bad ban wad jingiarap na ki briew kiba marjan, kiba la pyntip sha ki bor khmih ba kin pynlip ia ka bording.
Dei hadien bala poi ki para shnong, kila pynkit noh ia ka met jong kane ka longkmie sha Civil Hospital ban pyndep ia ki jingdonkam baroh.
U Rangbah Shnong ka Umran Dairy Bah Lambor Mukhim Bina, ula iathuh ba mar syn tip ia katei ka jingjia, ula leit mareh bak bak sha katei ka jaka bad lap ia kane ka longkmie kaba la thiah lyngktar ha madan. U pyntip ba mar mar ula pyntip noh sha ki Pulit kiba la wan ban tohkit bad pynkit noh ia ka met sha Civil Hospital.
Kat kum ka jingong jong u, na kaba shu peit, une u sainar elektrik lehse um dei uba la dkut slem namar kam shym la don satia kano kano ka jingthut ha ka bording elektrik hapoh ka Shnong.
