Shillong, Rymphang 14: Ka Hynniewtrep Achik National Movement (HANM) hynne ka sngi kala dawa na u Lamphang ka ingdorbar thaw ain ka Jylla ban sdang pyndonkam noh iaka ktien Khasi bad Garo haka por ba pynlong Dorbar.
Haba kren sha ki lad pathai khubor hadien ka jingiakynduh ia u Lamphang ka ingdorbar, u President ka HANM u Bah Lamphrang Kharbani ula ong baka HANM kala ai jingmut ba naduh ka 16 tarik mynta u bnai, u Lamphang udei ban shah iaki dkhot ka iing ba kin kren, haka ktien Khasi ne Garo.
U Bah Lamphrang ula ong ba ka Dorbar Mang Tyngka kan sdang naduh 16 tarik mynta u bnai bad ka seng kala ai jingmut ia u Lamphang ban buh daki nongpynkylla ktien naka bynta kito ki dkhot ki bym sngewthuh iaka ktien Khasi ne Garo
“Watla ka Meghalaya Legislative Assembly kala mynjur daka Resolution ban dawa ai jingithuh iaka ktien Khasi bad Garo hynrei haduh mynta kane ka dang sahkut bad ka Sorkar Pdeng. Namar kata, kadei ka kamram jong ka Iingdorbar thaw ain ka Jylla ban sdang pyntreikam hi nalade ia ki ktien tynrai haka por long Dorbar” la ong u Bah Lamphrang.
“Ngi la pynsngew sha u Lamphang. Ai baka Sorkar bad ka ingdorbar thaw ain kan leh iaka ba donkam daka ba pyndonkam iaki ktien tynrai bad ka HANM kan leh iaka ba donkam ban leit iakhih sha Nongbah Delhi ban pynsngew shaka Sorkar Pdeng ba kadei ban ai jingithuh noh iaka ktien Khasi bad Garo” ula ong.
U Bah Lamphang ula pyntip ba hadien ka jingthaw Sorkar Pdeng thymmai hadien ka ilekshon MP, ka HANM kan leit biang sha Delhi ban iakhih daka ba shah thngan haduh ban da ioh jingmynjur naka Sorkar Pdeng.
