Shillong, Rymphang 13 : Ki samla pule ka St.Anthony’s College hapoh ka jingialam ka NEHU Students Union (NEHUSU), kila pynpaw ia ka pyrshah ia ka hukum jong ki bor pyniaid College ba bthah ia ki samla pule ban phong jain college ne uniform haba wan sha klas.
Kine ki samla pule ki dei kiba pule ia ka 4th Semester, kiban sa pule sa ia ka 5th Semester, ka semester ba khatduh ban pyndep ia ka jingpule.
Lah ban kdew baka St. Anthony’s College Shillong, haka 29 tarik Naiwieng, kala pynmih iaka hukum ba bthah ia baroh ki samla Pule ba kin phong noh daki jain college lane Uniform haba wan sha klas naduh mynta u snem.
Halor kane, kine ki samla pule 4th Semester kila pynlong ia ka signature campaign ban pynpaw ia ka jingpyrshah halor kane ka hukum jong ka College bad pyntip ba haduh 400 ngut ki samla pule kila ai jingkyrshan.
Kine ki samla pule kila leit ban iakynduh ia u Principal ka College Rev Br Dr Albert Dkhar ban pynsngew ia ka jingeh jong ki samla pule na kane ka hukum ba syndet syndet jong ka College.
Haba kren sha ki lad pathai khubor, u samla Arman Malngiang ula iathuh ba ki samla pule kila dawa na u Principal ba dei ban pyllait noh ia ki samla pule 4th Semester na ka hukum phong uniform ban wan klas.
“Ngi don satang shi semester ban pyndep ia ka jingpule bad ki uniform ki dei kiba shongdor da T.5000 tam, hap pyrkhat lem ia ngi kiba wan college satang shisnem” ula ong.
U samla Arman u pyntip ba ka jingshim klas ia ki 4th Semester kan sdang ha ka taiew ban wan bad baroh ki samla pule ka semester kila rai ban nym phong satia ia ki uniform ban wan klas. U iathuh ba ia kane ka rai ki samla pule ruh la pyntip sha u Principal khnang ba un nym shim ia kano kano ka lynti ban pynshitom ia ki samla pule.
Hynrei u iathuh ba u Principal u khlem ai satia ia kano kano ka jingkular halor kine ki jingdawa bad pyntip ba un sa rah iakren ia kane ka jingeh ki samla pule sha ki bor bahlor kiba dei ki Salesian.
Une u samla ula pyntip ruh ba naka liang ki samla pule kila dawa ruh na u Principal ba naduh u snem ban wan, ka College ka dei ban thoh shai haki Prospectus bad ki Form, ba ka long mandatory ne bym lah iaid lait na ka jinghap phong Uniform hapoh ka College.
Haba kylli u samla Arman ula pyntip ba iaka hukum ba pynmih ban bthah iaki samla pule ban phong uniform la pynmih daka Governing Body jong ka College.
