Nongpoh, Rymphang 06: Ka Ribhoi District Sports Association (RBDSA) kala pynbna ba kan pynkup burom ia ki rang bad ki thei ialehkai ka District, kiba mihkhmat ia ka District sha ka 5th Meghalaya Games 2024 bad wanrah ia ka nam kum ka lahduh kaba ar ha kane ka lympung ba hehduh ka Jylla.
Ka RBDSA kala pyntip ia ka jingialang pynkup burom yn sa pynlong ha ka 13 tarik Rymphang ha District Library Hall, Nongpoh.
Ka jingpynkup burom kan long ia kito kiba jop bad khur takma na ka 5th Meghalaya Games bad kumjuh ruh ia ki rang ialehkai phutbol ka Ri-Bhoi kiba mihkhmat ia ka Jylla sha ka Khelo India Youth Games ba dang shu dep, kiba la wan phai kum ki Champion jong kane ka lympung ialehkai ka Ri.
Haba kren sha ki lad pathai khubor, u Senior Vice President ka RBDSA bah GS Shadap ha ryngkat la jingiadonlang u President ka RBDSA u Bah RB Shadap lem bad bah u Dipul Ryntathiang, u la ïathuh ba ka RBDSA ka sngew nguh eh ïa baroh ki rang bad ki thei ialehkai kiba la lah ban kyntiew ïaka nam bad ka burom jong ka District lyngba ka jinglah jong ki ban khur iaki takma haki jingialehkai bapher bapher.
“Lum ka seng kaba ju peit iaki kam ïalehkai hapoh ka District, ngi sngew dei eh ban pynlong iaka program pynkup burom kyrpang eh naka bynta jong kine ki nongialehkai ka District kiba wanrah ia ka nam” ula ong.
U bah GS Shadap u la ong ka RBDSA ka khot ïawer ïa baroh ki nongialehkai kiba la khur takma haka Meghalaya Game bad ki rang ïalehkai ball sha ka lympung Khelo India Youth Game ba kin wan sha kane ka program kaba la pynlong kyrpang naka bynta jong ki.
Shuh shuh u la pyntip ba ka RBDSA ka khot ïawer ruh ïa baroh ki 5 ngut ki MLA bad MDC jong ki 5 tylli ki constituency bad kumjuh ruh ïa ki seng Bhalang bapher bapher jong ka Dong Ribhoi ba kin wan ban ai mynsiem lem ha katei ka sngi.
U la pynpaw ruh ba ka RBDSA ka khot sngewbha ruh ïa baroh ki Nongialehkai kiba rim kiba la mihkhmat haka kyrteng jong ka Ribhoi ba kin wan ban ïa don lang ha katei ka sngi. U pyntip ba ka Myntri jong ka sorkar jylla Dr. Ampareen Lyndoh kan sa wan ban ïa ai mynsiem lang ha katei ka sngi kum ka kongsan.
