Shillong, Rymphang 05: U Nongaiktien ka Sorkar MDA bad Myntri Sorkar Bah Paul Lyngdoh ha ka sngi Nyngkong ula ong ba jaka ka don byllai ia ki MLA ka Liang Pyrshah ban kren ia ki ishu jong ki hapoh ki saw kynroh jong ka Iingdorbar Thaw Ain ka Jylla ha ka jaka ban ialam ia ki nongthep vote sha surok manla ka por.
U Bah Paul ula kynthoh ia kane halor ka sienjam jong ki MLA ka VPP ban rah ia man ki ishu sha surok. Dang shen, ki MLA ka VPP kila pynlong ia ka jingiashong kyllain mungor ba dawa thungkam biang ia ki Ophisar bala shongthait, kiba la shah weng noh na ka Lokayukta.
Haba iakren bad ki nongthoh khubor, u Bah Paul ula ong ba ka jingthmu baroh ban don ia ka Iingdorbar ka long ban ailad ia ki Nongthaw Ain ba kin iatai nia bad iashimbynta ha ki jingiatai.
“Mynta ki nongthep vote kila ai ha ngi ia ka rai ha manla ka constituency bad ki paidbah ki khmih lynti ia ki nongmihkhmat ba kin kren ia ka bha ka miat jong ki hapoh ka Iingdorbar” ula ong haba bynrap “Hynrei lada ngi ialam noh ia ki nongthep vote sha surok man ka por, ka jingthmu haba pynlong ia ka elekshon kala shah jop noh” ula ong.
U Bah Paul uba dei ruh u Working President ka UDP ula ong ba nalor kane, ki dkhot ka Liang Pyrshah ki dei ruh ki dkhot ba kongsan ha ki Committee bapher bapher bala thung daka Iingdorbar Thaw Ain.
“Wat ka Public Account Committee kaba la khein kum ka Mini Assembly bad ka ba shong jingialang haba ym don dorbar satia hapoh ka Iingdorbar Thaw Ain, ka dei kaba la khlieh da u dkhot ka Liang Pyrshah. Namar kata, ka jaka ka bun ia ka Liang Pyrshah ban kren ia baroh ki ishu hapoh ki saw kynroh jong ka Iingdorbar Thaw Ain bad hapoh ki Committee bala thung da ka Iingdorbar” ula ong.
