Bangkok, Naitung 30: U Myntri Rangbah ka Jylla Conrad Kongkal Sangma, hynne ka sngi saitjain, ula ban jur ia ka jingdonkam ban pynkhlain ia ka lad pyniasoh hapdeng ki Jylla ka thain Shatei Lam Mihngi ka Ri India bad ka Thailand bad ong ba ka Bangkok bad kiwei ki ri jong ka South East Asia ki dei kiba dang jan bha sha ka thain Shatei Lam Mihngi ban ia ka Nongbah jong ka Ri India ka New Delhi.
U Myntri Rangbah ka Jylla ula kren ia kane ha ka jingialang plie jong ka North East Festival kaba ar-kaba la sdang hynne ka sngi ha Centara Grand Hotel, Bangkok, Thailand.
“Ka jingiajan jong ka Thain Shatei Lam Mihngi ka Ri India bad ki Ri ka South East Asia kala plie lynti ia ka thain ha kiba bun ki jingiadei kam bad kine ki Ri ka dewbah Asia la ka dei ha ka khaii ka pateng, ka kam jngohkai bad kiwei kiwei ki businesss” ong u Conrad.
U Conrad ula kren ruh ia kane hadien ka jingpynbna jong u Symbud Myntri Rangbah Duh ka Thailand u Jurin Laksanawisit bad u Myntri Khynnah ka kam korbar bar ri ka India u Dr.Rajkumar Ranjan Singh, ia ka Mini Free Rade Agreement (FTA) hapdeng ka Thailand bad ki katto katne ki Jylla ka Ri kynthup ka Assam lem bad ka jingshna ia ka surok Highway ba pyniasoh iaka Moreh, Manipur – Myanmar – Thailand.
North East welcomes the Hon’ble Deputy Prime Minister of the Kingdom of Thailand, H.E. Mr. Jurin Laksanawisit to the North East India Festival in Bangkok.@PMOIndia @kishanreddybjp @Neiphiu_Rio @ChownaMeinBJP @MDoNER_India @meghtourism @NorthEastFest pic.twitter.com/fQum7Hd2bQ
— Conrad Sangma (@SangmaConrad) July 30, 2022
U Myntri Rangbah ka Jylla ula ong ba ka jingiadei hapdeng ka India bad ka Thailand kala don la palat 2000 snem. Kane kala sdang naduh ka por jong u Syiem Ashoka jong ka spah snem ba lai, ha ka por ba wanrah ia ka niam Buddhist sha Thailand na India.
“Ka Niam Buddhist ka dei u tyllai ba pyniasoh ia kine ki artylli ki Ri. Ka jingiadei hapdeng ka India bad ka Thailand ka dei kaba la don ha ki thied snam” ula ong.
Haba kren halor ka “Act East Policy” bad ka mon treikam ki bor Synshar jong ka Sorkar India bad ki Jylla ka thain Shatei Lam Mihngi, ula ong ba u Myntri Rangbah Duh ka Ri u Narendra Modi ula pynleit jingmut bha sha ka thain ba kan kiew ha ka roi ka par bad ka ioh ka kor bad kane kan iarap ia ka thain ba kan kiew ruh ha ki kam khaii pateng bad ka jingpyn iajan bad ki Ri ka dewbah South East Asia.
“Ngi don hangne ia u Myntri Khynnah ki kam korbar Ri bad nga kyntu ia u ban shimkhia lang ha kaban lah ban pyniasoh biang ia ka kad Liengsuin na Guwahati sha ki Ri ka Dewbah Asia bad kumjuh ruh ka Kad Liengsuin na Imphal ka ban shimpor tang shi kynta ne shikynta shiteng ban poi sha Bangkok”. ula bynrap.
U Conrad ula ong ba ka jinglong jingman jong ki jaka ka Thain Shatei Lam Mihngi ka dei kaba pyniajan bha bad ki Ri jong ka South East Asia kynthup ka Bangkok nalor ka jingdon ia ki tynrai bapher bapher bad ki rukom ngeit. “Nga sngew ba ki don ki jingiadei hangne hangtai ia kaba ngi dei ban wad bad nga kyrmen ba lada ngi wad, kin sa iarap ia ngi ban pynurlong ia kaba ngi kwah ha ki sngi bad ki snem ban dang wan”.
Haba pyntip ia ka jingithuh ia uwei u Ophisar ka Ministry of Commerce ka Thailand uba la wan bunsien sha Ri India hynrei u bym pat iuhkjat satia hapoh ka thain Shatei Lam Mihngi, u Conrad ula ong “Kane ka pynlong ia nga ban sngewthuh ba ka don kaei re kaei kaba jah bad kaba donkam ban leh eiei noh ia kat kane ka kabu kaba don hakhmat”.
“Kum u Myntri Rangbah ka Jylla na ka thain Shatei Lam Mihngi ka Ri India, nga ju ngeit skhem bha ia kane bad thikna ba ka donkam ia ka jingkyntur watla ngi iohi iashibun ki jingeh kiba hakhmat hynrei kiei kiei baroh ki sdang da ka jingdon ia ka mon treikam na ka liang ki bor ba bat ia ka synshar khadar” ula ong.
“Kane ka dei tang ka jingsdang ia ki kam aiu aiu ruh ba kin urlong. U Myntri Rangbah Duh ka Ri ula pynleit jingmut bha ia ka thain Shatei Lam Mihngi bad ban jur ba dei ban kyntiew noh ia kane ka thain bad da ki kabu kiba don baroh ngi dei ban lah ban plie ia ki lad ki lynti kiba don ha ka thain” ula bynrap.
U Myntri Rangbah ka Jylla ula ban jur ruh ia ka jingdonkam ban don ki Policy treikam bad ki jingiadei hapdeng ki Nongshongshnong ka thain Shatei Lam Mihngi ka Ri India bad ki Ri ka South East Asia khnang ba kan iaid ha ryngkat ka mon treikam jong ki bor synshar khadar ban pynurlong ia kiei kiei baroh .
U Conrad ula kdew ruh ba ka jingkynshew pisa ka dei kawei pat ka mat kaba kongsan bad khlem ma ka, kiei kiei baroh kin nym iaid ha ka lynti kaba dei.
“Nga tip ba kane ka NE Festival kan kut noh lashai ka sngi, hynrei ngam kwah ba kan shu kut noh kumto khlem da pynbteng ia ka jingiadei hapdeng ki nongsengkam, ki Sorkar Jylla bad ki Sorkar Pdeng ban pynthikna ba ka jingiatrei lang kan ym shu kut noh” ula ong.
