Shillong, Naitung 30 : Ka party United Democratic Party ha Mawlai constituency ka la pra phum hadien ba ki nongialam bahakhmat kynthup ia u MLA barim Bah Embhah Syiemlieh ki la shim ia ka rai ban mih noh na ka party khyndiat bnai shwa ka elekshon MLA 2023.
Ia kane ka rai, kitei ki nongialam ba hakhmat ryngkat u Bah Embhah ki la shim ha ka jingialang kaba long ha Mawlai ha ka janmiet sngi Thohdieng da kaba kynnoh ba ka don ka jingbym burom shuh ia ki nongialam barim.
Haba kren ha kane ka jingialang shwa ban shim ia ka rai ban resain lut ki nongialam, u Bah Embhah u la ong, “Nga sngewsih haduh katta katta ban iohi ba ki nongialam ka UDP kiba la trei shitom ha kine ki khatsan snem ban pynkhlain ia ka party ki la shah iaid lait lut ha baroh ki liang naduh ba wan ki nongialam ba thymmai”.
U ong ruh ba katei ka jingjia ka la pynisih haduh katta katta ia ka jinglong jingman ha ka UDP haduh ba kim banse shuh ban shim noh da katei ka rai namar watla bunsien ki pynsngew sha ki bor bahalor ruh pynban ym poi shaei shaei.
“Na ka party ka la dei ban pynbeit mardor lane aiti ha ki nongialam ka Shillong City ban pynbeit hynrei kam shym la leh satia” ong u Bah Embhah.
Ki nongialam ba hakhmat kiba iehnoh kam na ka UDP ha katei ka sngi ki kynthup ia jan baroh ki nongialam na ki unit bapher bapher kiba dang hap ha ka mawlai constituency kynthup ruh ia ki nongialam ba hakhmat ha ka Mawlai Circle.
Katei ka jingialang ka la shim ruh ia ka rai ba kin peit thuh shwa mynta shipor shaei kin leit, kata la kin leit kyrshan noh ia uno uno u kyrtong lane ban mih hi dalade.
