Shillong, Rymphang 01: U Symbud Myntri Rangbah ka jylla u Bah Prestone Tynsong ula ong ba yn khang ia ki kali ban iaid na ka jingkieng Damsite ne Umiam tang ha ka por ba dang bujli ia ki Bearing kaban shim por 3 haduh 7 kynta bad hadien kane ki kali rit kin bteng ka jingioh ban iaid biang.
“Kala don ka jingiapynbeit hapdeng ka tnad PWD bad ka tnad Power ba yn khang iaka jingiaid ki kali tang ha ka por ba bujli ia ki Bearing bad ka Technical Team kala dep ban pynpaw ba kin hap ban rah shajrong ia ka jingkieng ka ban bam por la kumno kumno naduh 3 kynta haduh 7 kynta” ula ong.
Ula ong ba ia ka jingkhang ban iaid na ka jingkieng ka long tang ia ki kali heh bad ia ki kali kamai bad ka tnad Power kan sa pyntip iaka por naduh katno baje haduh katno baje ha ka por ba trei iaka kam ban buh ia ki Bearing khnang ba ki paidbah kiba iaid ba ieng kin tip lypa khnang ba kin leit ban iaid na kiwei pat ki jaka.
“Ia mynta shipor hi, ngim banse ban pynkhreh ia ka surok na Umroi-Umrynjah- Mawtawar – Shillong, ka Shillong Bypass-Diengpasoh-NEIGRIHMS bad ka surok na Umsaw ban mih sha Mawmaram. Kine kidei ki lynti kiba ngim banse shuh ban pyndonkam namar kan don katto katne ka jingdkoh na ka bynta ki nongleit nongwan hynrei kane kam dei kaba neh shi rta hynrei kan long tang shipor” ong u Symbud Myntri Rangbah.
Ula ong, ba ki paidbah kin hap ban shah shitom tang ia ka por 3 haduh 7 kynta ha kapor ba buh ia ki Bearing bad hadien kane ki kali rit kin ioh ban iaid biang na kane ka jingkieng.
“Naduh mynno, ka Tnad PWD kala thrang ban shna da ka jingkieng kaba thymmai, hynrei sniewbok ba ka GSI kam shim la ai jingbit ban shna jingkieng shaneng jong ka jingkieng Umiam namar kan don ka jingktah bad kan pynshong synjor noh ia ka jingkieng kaba la don lypa. Mynta ngi lah aiti noh ha ka NHIDCL ba kan pynlong iaka jingsorbe thymmai iaka jaka ban tei iaka jingkieng kaba jrong bad ia ka surok na ki bynta kiba sharum jong ka jingkieng Umiam ban weng noh shi syndon ia ka jingeh” ong u Bah Prestone
Ula ong ba ka jingthmu mynta ka long ban shna iaka jingkieng na ka Industrial Estate Umiam bad mynta ka NHIDCL ryngkat bad ki Agency ki dang pynlong iaka jingsorbe iaka jaka bad kila leh ia ka Soil Testing bad kin sa ai jingtip ia ka sorkar jylla ban ioh ban shong ia ka jingialang bad ai jingmynjur ban tei iaka jingkieng bad iaka surok kaba thymmai.
“Ia katei ka jingkieng kaba thymmai ryngkat bad ka surok kaba thymmai yn pynlut da ka Ministry of Road Transport and National Highway namar ba katei ka surok ka hap ha ka National Highway” ong u Bah Prestone.
