Shillong, K’lyngkot 30 : U Myntri ka Tnad Pule Puthi Rakkam Sangma ha ka sngi Ba-ar, ula pyntip ba ka Sorkar Jylla ka don ia ka jingthmu ban pynrung lang noh ia ka ktien tynrai, ka deiriti tynrai, ka put ka tem bad ki kam ialehkai ha ki curriculum jong ki skulk a Jylla.
U Myntri u pyntip ba ka Sorkar kan sa iasyllok bad ki stad ki jhad, ki kynhun bapher bapher lem bad ki lai tylli ki Autonomous District Council (ADC)-ka KHADC, JHADC bad GHADC ban lah pynurlong ia kane ka kam.
U pyntip ba kane ka jingiasyllok kan sa long ha u bnai ban wan.
“Ngin sa iashong jingialang bad ka KHADC, JHADC, GHADC bad ruh ka Khasi Author Society bad kiwei kiwei ki kynhun. Ngi kwah ban iasyllok kumno ba ngin jam shakhmat ha kaban kynthup lang ia ka deiriti tynrai bad ki jingleh niam leh rukom nala tynrai jong ki nongshongshnong ka Jylla ha ka pule dangle” ong u Myntri.
