Ieid nyngkong ïa u Blei, ka tnga, ki khun bad ka Balang: Fr Sylvester Nongsiej
Nongstoiñ, K’lyngkot 29: Ka Dorbar pyllun ba 16 jong ka Synjuk ki Seng Rangbah Katholik Jylla niam Nongstoiñ, ha ka sngi U Blei, ka la pynkut ïa ka jingïaseng kyrpang ki rangbah, kaba la sdang naduh ka 26 tarik u Kyllalyngkot 2024.
Ha kine ki lai sngi kynthih, ka Synjuk ka la ïoh ban pynlong ruh shibun ki jinghikai haba ïadei bad ka Ktien jong U Blei, da kaba buh ruh ïa ka phang pdeng ka Ïukharist kaba ong, “Ka Ktien ka la wan longdoh bad ka la shongsah bad ngi”, kaba la pynshong nongrim na ka jutang ba thymmai lyngba ka Gospel u Ïoannis lynnong kaba 1 dkhot ba 14.
Ïa katei ka jingïaseng ba la pynkut noh hynnin ka sngi U Blei, la pynlong ha Mother of Compassion Mawkhlam Parish bad la sdang ïa ka jingleh niam, da ka jingtyrwa ïa ka jingkñia Mass Bakhuid da u Most Rev Wilbert Marweiñ, u Lyngdohsad ka Jyllaniam Nongstoiñ.
Kiwei ki kynthup ïa u Fr. Nicholas Maïong MSFS Parish Priest ka Mother of Compassion Parish Mawkhlam, u Fr Joby Mathew, kiwei kiwei ki phadar, ki sister bad ki paid riewngeit jong ka Balang Katholik, kiba la wan ban sakhi lang ia katei ka sngi ba kyrpang jong ki rangbah, na ki parish bapher bapher.
Ha ka jingïaseng nohphai sngi pat shuwa ban pyndep ïa ïa ka jingmane Sakrament Bakhuid, u Fr. Sylvester Nongsiej (Spiritual Director) u ba dei ruh u Parish Priest ka Mawthong Parish, u la ïoh ban sam ïa ka khubor na ka Ktien U Blei, ha kaba u la kyntu ruh ïa ki rangbah ba kin buh ïa kaban ieid nyngkong eh ïa U Blei, bud sa ïa ka Tnga bad ki khun, nangta ïa ka Balang namar kane ka long kaba donkam kum ki dkhot met jong U Khrist.
Ha katei ka sngi la ïadonlang ruh kiwei kiwei ki Lyngdoh, ki sister, ki brother, bad la pynïaid ïa katei ka jingïalang nohphai sngi da u bah Starbid Kharbani vice Chairman ka Synjuk ki Seng Rangbah Katholik Jyllaniam Nongstoiñ.
Katei ka lympung ka la long ruh kaba shitrhem bha, namar ka jingïashimbynta lang ki rangbah ban ïa shad kmen ha ki jingrwai ïaroh pyndon burom ïa U Blei hapoh ka jingïalam jong u Phadar Joby Mathew.
