Shillong, K’lyngkot 29 : Ka kynhun ialehkai phutbol ki shynrang ka Jylla Meghalaya, kala ioh rung sha ka phainal jong ka Khelo India Youth Games 2024 da ka jinglah pynliem haduh 5-3 kol pyrshah ia ka Jharkhand ha ka jingiakhun semi phainal ba long ha Tamil naduh hynne ka sngi Nyngkong.
Ha kane ka jingiakhun semi phainal ba iakhaid bha, ka kynhun ialehkai ka Jharkhand kala pyni ia ka jinglah ialehkai bha ha ki 20 minit jong ka kylla step bad ioh thep arkol tang hapoh ka 30 minit. Hynrei ha ka minit ba 35, ka Meghalaya kala ioh ban pynphai ia shi kol lyngba ka indirect free kick hapoh ka penalty box.
Ka jingiakhun ha ka kylla step kala kut da ka jingtam ka Jharkhand da 2-1 kol.
Haba wan phai sha ka kylla miet, ka kynhun ialehkai ka Meghalaya kala pyni ia ka sap ialehkai ba kynsai bad tang hapoh ka 30 minit, kala ioh ban thep haduh 4 kol bad ka jingiaroh ka leit sha u samla Mebanlamlynti Marsharing.
U Meban ula pyni ia ka jingtbit ban ialehkai bad ula ioh thep ia baroh 4 kol ha ka semi phainal, kaba la pynlong wat ia u commentator ban ai jingiaroh bha ia u, uba la pyniasyriem ruh ia ka rukom ialehkai jong u bad u khlur ialehkai ka India u Sunil Chhetri.
Ka Meghalaya mynta kala pynkhrhe ban iakhun ia ka nongjop jong ka semi phainal kaba ar, kaba long hapdeng ka Punjab bad ka Odisha mynta hi ka janmiet.
Ka jingiakhun jong ka phainal kan long ha ka 31 tarik u Kyllalyngkot.
