Shillong, K’lyngkot 29 : U Myntri Tnad Bording Abu Taher Mondal ula iathuh ba ka Sorkar kan sa khang ia ka jingiaid ki kali na Jingkieng Umiam ha u bnai Rymphang ban ioh bujli ia ki bearing.
U pyntip ba ia ka jingkieng Umiam yn sa rah kum shibynta jong ka kam ban bujli ia ki bearing, kaba lah ban long ha ka taiew ba-ar jong u bnai Rymphang.
U Myntri u pyntip ba yn khang dam ia ka jingiaid ki kali ha ka por ba bujli ia ki bearing bad ong “Ngin sa kyrpad ia ki nong niah kali ba kin iaid noh na kawei pat ka lynti. Ngin sa pynmih ia ka jingpynbna ia ka sngi ban khang dam ia ka jingkieng bad ia ki kynta ban khang”.
“Hadien ba ngi dep bujli ia ka beafing ngin sa ap ia ka por ban eh ka dewbilat bad ngin sa pynhiar ia u jack ba ka jingkieng kan hiar biang kumba ka ju long. Ha kane ka sngi, ngi khmih lynti ba phra kynta eiei kan ym don ka jingiaid kali hynrei hadien bala buh biang ia ka jingkieng ha ka jaka ba dei, ngin sa shah ia ki kali kum ki Ambulance bad ki kali rit”.
Ha kajuh ka por, u Myntri u pyntip ba ka National Highway Infrastructure Development Corporation Limited (NHIDCL) kala khmih ia ka kam ba iadei bad ka jingithuh ia ka jaka ban shna lynti iaid ba thymmai ne kawei pat ka lynti iaid ban lait na ka jingpyndonkam ia ka jingkieng.
U Myntri ula pyntip ba ula dep iakren bad ka NHIDCL bad kala pyrshang ban wad ia ka lynti iaid na shawei pat ka jaka ban ioh iaid ki kali.
Halor ka jingkieng rim ba hakhrum ka jingkieng umiam, u Myntri ula ong ba kane ka jingkieng ka dei kaba la shu ieh la slem slem bah bad kiba bun ki briew bala leit jngoh ia ka, ki pyntip ba kam long shuh ban pyndonkam ha kaban pyniaid kali.
