Shillong, Nailur 01: Ka Shillong Lajong FC ka la pynliem ia ka MLP FT da 2-0, ha ka lympung Shillong Premier League 2026 ba long hynne ka nohphai sngi ha SSA Stadium, Polo.
Ia kine ki artylli ki kol, ka Shillong Lajong FC ka la ioh ba kan thep ha ki ar kylla jong ka jingiakhun bad ia ka kol ba nyngkong la thep da u Ricky Kharkongor (39’) katba ka kol kaba ar la thep da u Lalmuansanga (54’).
Da kane ka jingjop, kala pynlong ia ka Lajong ba kan jam shakhmat khlem pat shah rem ha kane ka samoi katba na ka liang ka MLP FT kane ka dei ka namrem ba nyngkong ia ka.
Ka kol ba nyngkong ka Lajong ka la wan hadien ba u Lalmuansanga u la ioh ban rah kham shakhmat ia ka bol bad haka khyllipmat ba biang bha, ula pynbuh ia u Ricky ban khyrwit kham jam ia ka bol sha ka jar.
Ha ka kylla step ka MLP FT ka la ioh iaka kabu ksiar ba paka ba kan ioh pynkhih jar lyngba u Aldrin Ramsiej uba la khyrwit jam bha ia ka bol kaba la her suit nalor ka dieng kol.
Marsien ia sdang ka kylla miet, sa kawei ka kabu ksiar ia ka MLP FT kaba la ioh ba kan shut ia ka freekick lyngba u Bikram Chetri hynrei ka bol pat ka la kiew beit suit shalor bad poi pynban shabar jong ka kol.
Hadien kane, ka Lajong ka iai bteng ba kan nion borbah kaba plie lad ban ioh thep ia ka kol kaba ar, ha kaba u Lalmuansanga u la lah ban sam lyngba ia u Eveningstar bad ioh ban pynkhih biang ia ka jar.
Ha kaba kut noh kane ka jingiakhun, ka Shillong Lajong ka kylla long ka kynhun ialehkai ba nyngkong ba kan khur pura ia ka 10 point bad ban kiew syndon halor duh ka miej iakhein point jong kane ka lympung katba ka MLP FT kan hiar noh pat sha ka kyrdan kaba saw hadien ba ka la ioh ba kan khur 7 point.
Lashai ka sngi kin don artylli ki jingiakhun jong kane ka lympung, kaba nyngkong kan long ha ka por 1 baje nohphai sngi, ha kaba ka Laitkor kan iakhun pyrshah ia ka Langsning FC, bad ha ka por 5 baje janmiet, ka Nongkseh SSCC kan iakhun pyrshah ia ka Mawlai SC.
