Shillong, Nailur 1: Ka Meghalaya Football Association kan pynlong ïa ki trial ban jied ïa ka kynhun ïalehkai Sub-Junior Boys ki ban mih khmat ïa ka Meghalaya sha ka National Football Championship (NFC).
Halor kane, la kyrpad ïa baroh ki synjuk jong ki district ba ïasoh lang ba kin ai kyrteng bad phah ïa ki khynnah ïalehkai ba tbit tam jong ki na ka bynta ki trial, ka ban long ha ka 5 tarik Nailur ha madan MFA. Ki khynnah ialehkai ki dei ban wan ai jingtip ha ka por 11 baje mynstep ha katei ka sngi.
Ka jingïoh ïalehkai ka long tang ïa ki khynnah shynrang kiba la kha hapdeng ka 1 tarik kyllalyngkot 2013 haduh ka 31tarik Nohprah 2014. Ka long kaba donkam ïa baroh ki khynnah ïalehkai ban wanrah ïa ka syrnot sngi kha, ka Aadhaar card, ka CRS ID bad ka active DigiLocker sha ki trial.
Ki association ki dei ban phah ia ki khynnah ialehkai ba la jied jong ki sha ka MFA ha ka 3 tarik u Nailur ne shwa jong ka.
