Shillong, Kyllalyngkot 27: Ka Meghalaya kala iakhun pyrshah ia ka Mizoram ha ka Ranji Trophy kaba la long ha Anand, Gujarat bad ha kane ka jingialehkai kaba la sdang ha ka sngi Thohdieng ka Mizoram kaba la tied nyngkong kala kamai 359 run katba ka Meghalaya kaba la leit tied hynne ka sngi Saitjaiñ kala kamai 220 run bad hap 5 wiket bad ka Meghalaya ka dang hap ban kamai sa 139 run ban tam ia ka Mizoram.
Ka Mizoram kala kamai 359 run ha kaba u Agni Chopra ula ioh ia ka Century da kaba kamai 105 run, katba u Hruaizela ula kamai 57 bad u Vikash Kmr ula kamai 67 run.
U nongkawang bol ka Meghalaya u Akash Kumar Choudhury ula ioh 4 wiket, u Arbin Singh ula ioh shim 2 wiket, katba u Raj, u Swarajeet Das, Jaskirat bad u Dippu Ch Sangma kila shim mar 1 wiket.
Haba ka Meghalaya kala leit ban tied u Raj Biswa ula kamai 94 run bad u donkam sa tang 6 run ban ioh iaka Century bad u Raj u bym pat Out yn bteng ban tied biang lashai ka sngi ryngkat bad u Ram Gurung uba la kamai 32 run.
U Kishan Lyngdoh ula kamai 47 run, katba u Jaskirat Singh Sachdeva ula kamai 21 run.
Ka Meghalaya kan ialeh ban tied bad ban kamai bun ia ka run bad ban tam ia ka Mizoram bad khamtam ban ioh ba u Raj yn ioh ia ka Century.
