Shillong, K’lyngkot 25 : U samla Boltijoy Ryan Nongsiej uba sha ha Shillong, ula shah jied ban mihkhmat ia ka Ri India ha ka International Pageant ka ban long ha Vietnam ha u bnai Jylliew 2024.
Une u Samla ula shah jied hadien ka jingjop ia bun ki ‘Mister India Titles’ ha ka lympung iakop Global Model India “Mister India’ pageant kaba long ha Sangli, Maharashtra dang shen.
U samla Boltijoy uba la wan phai sha Shillong, ula khur ia katto katne ki titles jong ka ‘Mister India’ pageant ba long naduh ka 21 tarik haduh 25 tarik Dohprah 2023, kiba kyntnup ia ka “Mister Charismatic,” “Mister Northeast India 2023,” bad “Mister India 2023 Tourism Global”. Haduh 30 ngut ki nongiashimbynta na kylleng ka Ri India kila iakhun ha kane ka lympung.
“Nga ju ieid bha ia ka kam fashion. Ha ka por ba dang khynnah, haba iohsngew ia ki briew ba ki kren shaphang ki nongjop ia ka Miss Universe bad Miss World, nga ju pyrkhat halade ba lada don lang ka rynsan kaba shah ia ki shynrang ban iakhun ia ka nam Mr India lane Mr International bad hadien nga la tip ba ka Mr. India bad Mr. International kala don lypa” ong u samla Boltijoy.
“Haba ki bahaiing ki iakren halor ki nongjop ia ka Miss Universe kum ka Aishwarya Rai, Lara Dutta bad kiwei kiwei, nga ju pyrkhat ialade ba ngan jop lang kum ma ki ha kawei ka sngi bad katno kane kan pynkmen ia ki bahaiing hasem jong nga. Nga long uba kloi ban shim ia kano kano ka lad ka kabu ka ban iarap ia nga ba ngan ioh ia ki jingjop bad ban lah kynjoh ia kiba bun ki thong jong nga ha ka jingim” ula bynrap.
U samla Boltijoy ula ong “Nga la shim ia ka lad ban iakhun ha kane ka pageant (Global Model India “Mister India’) bad nga la jop ia katto katne ki titles kiba nga kwah hynrei nyngkong eh, nga shim ia kane ka lad ban ioh kyrshan ia I Mei iba la trrei shitom ha baroh ka jingim jong I”.
U samla Boltijoy u dei u nong Meghalaya ba nyngkong eh na ki shynrang ban mihkhmat ia ka ri India shabar ka Ri bad ban mihkhmat ia ka Mister Tourism Global in The King & Queen of Mister and Miss International ha ka jingiatreilang bad ka Global Model India International hadien 5 snem.
Une u Samla u dei uba la pass ia ka Bachelor ha ka Music na St Anthony’s College bad mynta u dang pule ia ka Master’s Degree ha ka Tourism and Travel Management ha Martin Luther Christian University, Shillong.
