Shillong, K’lyngkot 23 : U Myntri Rangbah ka Jylla Conrad K Sangma ha ka sngi Ba-ar, ula ong ba ka jingrwai State Anthem ka dei kaba la pynshong nongrim kat kum ka Official Language (English) bad ki artylli ki Associate Official Language ka Jylla-ka Khasi bad Garo.
Haba iakren bad ki nongthoh khubor, u Conrad ula ong “Ngi la pynshong nongrim ia ka rai jong ngi halor ki kyndon kiba don hapoh ki Ain lane ki Rules….Ngi la iaid beit ha kane ka nongrim bad ngi la buh ia kine ki ktien (ha ka Anthem) halor ka nongrim jong ka Official bad Associate Official Language”.
Hadien ka jingpyllait paidbah ia ka State Anthem, ki seng sain pyrthei bad ki sengbhalang kila pynpaw ia ka jingsngew khia halor ka jingbym pynrung lang ia ka ktien Jaintia ha kane ka jingrwai ka Jylla.
“Lada ngi iaid lait ia kane, ngim don daw eiei shuh ban ai ia kiwei pat, kiba lah ban dawa lashai lashisngi. Lashai ngi lah ban don ki Bhoi kiba ong ba ki kwah shikyntien ka ktien Bhoi ban don ha ka jingrwai lane kawei ka kyntien na kiwei pat ki riewlum kiba don ha ka Jylla. Lada ngi pynskan ba ngim lah, kin sa ong ba phi la ai ia kawei ka ktien ne katei ka ktien bad kuma kan buh jingeh ia ka Sorkar ban pynksan. Ngi hap ban leh ia ki kam halor ki kyndon kiba don ha ki rule lane ki ain bad dei kata ka daw ba ngi la shna ia kane ka jingrwai kat kum ki kyndon ba don”.
Kumjuh ruh haba iakren bad ki nongthoh khubor ban pynshai ia kane ka jingsngewthuh bakla ia kane ka kam, u Myntri ka Tnad Arts & Culture Bah Paul Lyngdoh ula ong ba ka Kynhun Myntri ka dei kaba hap iaid kat kum ki Rule, ki Ain kiba don bad ka State Anthem ka Meghalaya ka dei kaba hap iaid katkum ki Ain bad ki Rule bala pyntreikam da ka Jylla.
Ula pyntip ba ka Meghalaya State Language Act 2005 ka dei kaba la mynjur da ka Iingdorbar Thaw Ain ka Jylla bad kala ioh ia ka jingmynjur jong u Lat ka Jylla ha ka 1 tarik Jymmang 2005. La pynmih ha ka Gazette ka Meghalaya ha ka 4 tarik Jymmang, 2005.
U Bah Paul ula ong ba ka Act kala kren shai ba ka ktien phareng kan dang iai bteng ban long ka Official Language jong ka Jylla Meghalaya bad ba ka ktien Khasi bad Garo lah ban pyndonkam kum ki Associate Official Language ha baroh ki kam ha ki District, Sub Division bad ki Block jong ka Sorkar Jylla kiba don ha ki District ka Ri-lum Khasi Jaintia bad Garo Hills.
“Kane ka (Act) dei halor ka nongrim ba la thmu bad thaw ia ka State Anthem. Kam dei satia ka jingkwah jongno re jongno ban ibein ia kano kano ka jaidbynriew hynrei kaei kaba la ong da u MP ka Shillong ba ong balei ba ka ktien Pnar kam shah kynthup ka dei namar ka Language Act kaba la wanrah ha Iingdorbar da ka Sorkar Congress hapoh ka jingialam Bah DD Lapang kum u Myntri Rangbah ha u snem 2005 mynba ka Congress ka dang don ha ka bor bad u MP ha katei ka por ruh u dei na ka Congress” ula ong.
Halor ka jingkylli, u Bah Paul ula ong “Katba ngi dang don ia ka Official Language Act kaba dang treikam bad katba ym pat lah pynkylla ia kane ka Act, ngam tharai ba don ba lah ban bynrap, weng ne wanrah ia ka Anthem kaba thymmai”.
“Hato phi mut ong ba ha u 2005 ym shym la don ki Dkhot na Ri-lum Jaintia ha ka Cabinet, hato phi ong ba ha u 2008 (ha ka por ba thaw ia ka Rule) ym shym la don MLA na Ri-lum Jaintia?. Balei ba ym shym la kren ia kane ka mat ha u 2005 bad 2008 bad mynta ba ka Sorkar kala pynshong nongrim ia ka Anthem naka Act bala rai da ka Assembly bad mynjur da u Lat ban long ka Act, sa kaei pat phi khmih lynti ia ka Sorkar ba kan leh” ula bynrap.
 halor ka nongrim jong ka Official bad Associate Official Language”.){kind=link}