Shillong, K’lyngkot 22 : Ka Myntri ka Koit ka Khiah Kong Ampareen Lyngdoh ha ka sngi Nyngkong kala ong ba ka eksam thungkam hapoh ka North Eastern Indira Gandhi Regional Institute of Health & Medical Science (NEIGRIHMS) ka dei ban pynlong hapoh ka Jylla.
“Ha ka jingtip jong nga, naduh nangne shakhmat, ia ki eksamin ba thmu ban pynlong, dei ban pynlong noh hapoh u pud u sam jong ka Jylla ba don ka Instititute kata hapoh ka Jylla Meghalaya” ong ka kong Ampareen haba iakren bad ki nongthoh khubor.
“Ngi la dep pynpaw ruh ba ki don bun ki service provider kiba lah ban pynlong ia kum kine ki eksam kat kum ka jingdon kam ka NEIGRIHMS bad ngam tharai ba ha ka jingthungkam biang ha NEIGRIHMS kan ym iaid lait ia kane namar ngi lah dep iakren wat shaduh ki bor ba hakhlieh jong ka Tnad ka koit ka khiah, ka Sorkar India” kala ong.
Halor ka jingkynnoh ka HYC ba ka dei ka policy pyrshah riewlum jong ka NEIGRIHMS haba iadei bad ka rukom thungkam, ka kong Ampareen kala ong “Nga la dep iakrren ia kane ka kam bad u Director ka NEIGRIHMS bad nga la kyntu ia u ban pynthikna ba kan don ka jingleh hok ha ka jingthungkam ia ki briew ha baroh kine ki kam ba lait. Hynrei, ka NEIGRIHMS ka dei ka shnat treikam ba laitluid,kino kino kiba kwah ban pynpoi ia kano kano ka kam sha ka jingtip ka NEIGRIHMS kin hap ban ai sha ngi da ka jingthoh. Ka KSU kala ai sha ngi da ka jingthoh ba ngin tuklar, u Myntri Rangbah ruh ula ai jingthoh lang ba kyrshan ia kane ka jingsngew ka KSU”.
