Imphal, K’lyngkot 23: Ka kynhun ba leh ngut ki Heh ka MHA ba ialam da u Advisor AK Mishra, kala poi ha Manipur ha ka sngi Nyngkong, ban iakynduh ia ki kynhun bapher bapher ha kaban lah tehlakam noh ia ka jinngiaumsnam.
Kane ka kynhun bala synran da ki arngut ki Joint Director na ka Intelligence Bureau kata u Mandeep Singh Tuli bad Rajesh Kumble, kila iashong jingialang bad ki Heh Sorkar lem bad ki Nongialam jong ki seng bapher bapher.
Ka jingleit ka kynhun ka MHA sha Manipur, ka dei kaba donkam bha namar katto katne ki kynhun kila shim rai ban pynlong ia ki jingiakhih kiba jur lad aka Sorkar kam leh eiei noh pyrshah ia ki kynhun kaikhlaw bad ki poi wir na Myanmar.
Ka kynhun kala iakynduh ruh ia ki Nongmihkhmat paidbah, ki nongialam na ki seng bapher bapher, ki heh Sorkar tang mar syn poi ha kane ka Jylla.
Kane ka kynhun kala poi ha kane ka Jylla tang da ki sngi hadien ba khie biang ki kam umsnam. Arngut ki Pulit Commando kila iap bad bun ngut kila mynsaw ha ka jingiather kuli hapdeng ki bor pahara bad ki kaikhlaw ha Moreh, kaba la jia ha ka 17 tarik Kyllalyngkot.
Ha ka sngi ba bud, san ngut ki riew paidbah kila shah pyniap ha ki kynhun kaikhlaw ha ki artylli ki jingjia. Saw ngut kila shah pyniap ha Ningthoukhong Kha Khunou, Bishnupur district, bad uwei ha Kangchup Chingkhong, Kangpokpi district.
