Silchar, Naitung 28 :Ka jingshah kem jong uwei u samla nong Assam na Bangalore mynta ka la lam sha ka jingiadei ka jong u bad ka kynhun seng lehnoh Al Qaida.
Hynnin ka sngi Balang, ki bor pulit ka Katigorah ki la pynlong ka jingleit jurip ia ka iingsah jong ka Sajida Begum ha Telitikor ha Cachar, Assam ka ba u khun jong ka u Akhtar Hussain Barbhuiyan u la shah kem noh halor ka jingkynnoh donkti bad ka Al Qaida ka ba dei ka kynhun seng lehnoh ka pyrthei.
Ki tyllong khubor ki iathuh ba u Akhtar u ba trei kum u delivery boy ha Bangalore naduh ka snem 2018 u la shah kem noh ha kane ka sngi Nyngkong ba la lah ha ka tnat central crime branch. U Akhtar u la shah kem noh na ka flat ka ba u shong u sah ha Jayanagar ha Bangalore namar ka jingshah kynnoh donkti bad ka kynhun seng lehnoh Laskar-e-Tayba, hynrei hadien ba la pynlong ia ka jingtohkit ki dkhot ka tnat central crime branch ki la lapksai ba u Akhar u trei na ka bynta ka Al Qaida.
Ha kawei pat ka bynta na ka liang ka Sajida Begum ka la kyntait halor ka jingdonkti u khun jong ka bad kino kino ki kynhun seng lehnoh. Ka Sajidaka la ong ba ka la iakren bad u Akhtar ha kane ka sngi Saitjain ba la lah bad naduh katei ka por ka mobile phone jong u ka la jah noh (switched off).
Kham hadien ka la ioh jingtip na ki bor pulit ka thain ba u khun jong ka u la shah kem noh ha Bangalore. Na ka liang u kpa jong u Akhtar u Abdul Kader Laskar u la khlad noh dang ha kine ki khyndiat snem ba la dep. U para jong u Akhtar u Adil Hussain Laskar ruh u dei u ba trei hapoh Bangalore.
