Sivasagar, Naitung 28 :Ia ka jingialang jong ka All Sivasagar District Students’ Union (ASDSU) ka ba dei ka bynta jong ka All Assam Students’ Union (AASU) bad ka jingialang jong ka kynhun ki artylli ki students union na ki artylli ki subdivision bad baroh ki students union jong ka thain hapoh ka lama jong ka ASDSU la pynlong hynnin ka sngi ba Ar ha Boarding Road, Sivasagar.
Ia kane ka jingialang la pyniaid da u Manab Hazarika, president ka ASDSU. Na ka liang u general secretary ka ASDSU u Dipankar Saikia u la kren halor ki jingthmu ha kaba pynlong ia kane ki jingialang ban iamir jingmut halor ka mat ka ba iadei bad ka pule puthi, ka jinglong jingman hapoh ka imlang ka sahlang ha ka district bad ruh halor ki kam pynpaw pyrshah Assam da ka tnat pynmih mar umphniang ba heh tam ka India, ka ONGC.
Ha kine ki jingialang la ia don lang u Advisor ka ASDSU u ba dei ruh u dkhot ka central executive ka AASU u Samiran Phukan, ki nongialam ka AASU u Partha Pratim Baruah, Debajit Gogoi, Ankur Bora bad kiwei pat ki dkhot ba halor jong ka seng ki ba la iashim bynta ruh ha ka jingiamir jingmut.
Ban pynpaw pyrshah halor ka jingpulom jong ka sorkar ban kyntiew ia ka thain Sivasagar, bad ruh halor ka jingdawa ban pynlong ia ka Sivasagar ka thain ka ba pawkhmat kumba la pynbna ha ka dorbar mangtyngka, kumjuh ban pynlong ia ka RGIPT bad ka ARGUCOM kum ki jaka pule ba pura nalor kiwei pat ki jingdawa, na ka liang ka seng samla pule kan pynlong da ka jingiakhih hakhmat ka ophis u Deputy Commissioner ha Sivasagar ha ka 4 tarik u Nailar u ban wan.
Nalor kata ka seng kan pynlong ruh ka jingiakhih pyrshah hakhmat ka headquarter jong ka ONGC, Assam Asset ha Nazira ha ka 9 tarik u Nailar u ban wan namar ki kam pynpaw pyrshah Assam jong ka ONGC.
