Nongpoh, Kyllalyngkot 21: Ka Meghalaya Pradesh Congress Committee (MPCC) hynne ka sngi U Blei kala hiar sha Ri-Bhoi ban pynkhreh ia ka jingpdiang ia ka ‘Bharat Jodo Nyay Yatra’ jong u Rahul Gandhi ka ban long lashai ka sngi Nyngkong ha Nongpoh.
U Rahul Gandhi ha ryngkat ki nongialam ka AICC kin wan pynlong ia ka Bharat Jodo Nyay Yatra ha ka madan ialehkai jong ka NSSA Pahamsyiem ha Nongpoh.
Ka jingwan iuhkjat jong u Rahul Gandhi nongialam ka INC kaba dei ruh shibynta ka jingiaid kjat (yatra) ban ialap halor ka jingdonkam ban ioh ia ka jingsynshar ba laitluid, ka hok longbriew manbriew, ka hok ban mane blei bad kiwei kiwei kaba la sdang na Jylla Manipur myn ha ka 14 tarik na Manipur.
Ka MPCC ka pyntip ba kane ka jingwan iaid kjat u Rahul Gandhi kan sdang naduh Jorabat bad yn iaid kjat na ophis DTO Nongpoh bad yn pynkut haduh ka madan Pahamsyiem, ha kaba kan sa don ruh ka jingialang paidbah ban pynsngewthuh paidbah halor ka jingthmu jong kane ka Bharat Jodo Nyay Yatra.
Ki nongialam ka party Congress ki la khot la wer ia ki paidbah nongshong shnong ka jylla khamtam na Ri Bhoi District ba kin wan ban shimbynta ha kane ka jingialang paidbah kaban long ha madan Pahamsyiem.
