Angnud u CM ban lah sei ka Meghalaya ia ki nongialehkai Olympics
Shillong Kyllalyngkot 20: Ka Sorkar Jylla kala kut jingmut ban bteng ha ka jingbhah tyngka ha ka kam ialehkai, da kaba pynleit jingmut ha kaban pynbiang ia ki madan, ki jaka hikai ia ki nongialehkai bad ban pynkupbor ia baroh kiba don bynta lang.
“Ki samla kidei ban ioh ia ka lad ban pynurlong ia ka jingangnud ka jong ki, ban kren ia kaba ki don ha ka jingsngew bad ban long ki nongialam kiban wan jongka Meghalaya,” ong u Myntri Rangbah ka jylla u Conrad K Sangma haba ai jingkren ha ka jingpynhap pyrda ia ka 5th Meghalaya Games ha Tura hynne ka sngi Saitjaiñ.
U Conrad ula pynbna ruh ba iaka 6th Meghalaya Games yn pynlong ha Jowai, West Jaintia Hills.
“Haba ngi khylliap noh ia kane ka lynnong bad ngi peit shakhmat ia ka Meghalaya Games ha Jowai ha u snem 2025, ngi khmih lynti ban saindur bad ban pyniar ia ka kolshor haki kam ialehkai ha kylleng ki district, pynshlur ia ki jingangnud bad ban pynlong ia ka Meghalaya kaba khiah krat bad kaba khlain” ong u Myntri Rangbah.
“Ki nongpyniaid ia kane ka lympung ialehkai kila ai ia ngi ia ki jingtip kiba kongsan ha kaba iadei bad ka jingpynbiang ia ki jingdonkam na ka bynta ban pynlong ia ki lympung iakob ne ki world class sports bad kane kan iarap shibun ha kaban pynkhreh na ka bynta ka National Games” ula ong.
Haba jingiaroh halor ka jingjop jong ka 5th Meghalaya Games, u Myntri Rangbah ula ong, “Haba ngi ai khublei khatduh ia kane ka lympung ialehkai, nga ai khublei ia baroh kiba la pynlong ia kane ka jingiakob kaba jop. Ka jingpynlong ia kane ka lympung ha Tura kala long kaba kmen bha bad nga ai khublei kyrpang ia ki paidbah ka Tura ba kila long ki nongpynkhreh kiba biang bha. Nga ai khublei ia ka Don Bosco, Monfort, Durama College, BSF, 2nd Battalion jongka Meghalaya Police bad kiwei kiwei kiba la noh synniang ia ki jingdonkam ha ki jingiakob bad ha ka iingsah”.
“Mynta u snem kane ka Games, la sakhi ba la pynlong ia ki 23 tylli ki jait jingialehkai, 400+ ki jingiakob ban ioh ia ki takma ha kaba kala long ka bynta kaba khraw bha ban ioh sei ia ki nongialehkai kiba donsap bad ki nongialehkai kiban tynshaiñ ha ki snem ban wan naka bynta ka Meghalaya, ka jingnoh synniang ha kaban tei ia ka jinglong jingman ha ka kam ialehkai ha ki district bad ka jylla baroh kawei” ula bynrap.
Ula ong ba ka jingpynlong ia ki jingialehkai kam dei tang ka jingpynlut ia ka pisa ka sorkar, u Conrad ula ong, “Kadei ka jingbhah tyngka na ka bynta ka lawei ha ka kam ialehkai. Ka jingthmu ka jong ngi ka long ban mihkhmat ia ka India haka Olympics.”
“Ka long ka burom kaba khraw ba ka President ka India, ka Droupadi Murmu kala wan ban plie pyrda iaka Meghalaya Games. Ha baroh shi taiew, ngi la sakhi ia ki khana kiba sngewtynnad bad kiba sah jingkynmaw. Ki jingtei kiba thymmai bad kiba dang shu dep pynbha kidei kum shi bynta ban kyntiew iaka kam ialehkai kiba kynthup kum ia ka Pa Togan Nengminja Sangma Athletics Stadium, Indoor Hall Hawakhana, Don Bosco College Basketball Court bad Rongkhon Swimming Pool” ong u Myntri Rangbah.
Katba u Myntri ka kam ialehkai u Bah Shakliar Warjri ula iaroh iaka jingtrei shitom bad ia ka mynsiem iakhun jong ki nongialehkai.
“Ka jingsakhi iaka jingieid bad jingiakhun met bad mynsiem ki nongialehkai ha ka 5th Meghalaya Games kala long shisha kaba ai mynsiem bha. Ka jingjop ka jongki ka pyni ia ka jinglong shimet ka jongki bad kumjuh iaka jingkhlain jong ka mynsiem iakhun ka Meghalaya ha ka kam ialehkai. Da ka jingskhem jingmut, ngi ngeit skhem ba kito kiba la sakhi ia ki nongialehkai, kin sa iohi ia ki ba shisien ka sngi kin sa mihkhmat iaka ri India ha ki rynsan kiban long ha pyrthei” ong u Bah Shakliar.
Ula ong ba ka sorkar ka iengskhem ha kaban bei tyngka ha ki samla ka Meghalaya, ban saindur iaka kolshor jong ka jingtbit bad kajingiai neh skhem bad ha ki snem ban wan yn sa sakhi ia ka roi ka par ha kaba y sa tei shuh shuh ia ki jingtei ha ki kam ialehkai, kiban kynthup ia ka Indoor Hall ha Sunny Hills, Ampati Stadium, P.A. Sangma Indoor Halls, Jengjal, Bajengdoba bad Williamnagar.
Ka jingneh skhem ka jingmut ban tei ia ki jaka ialehkai ha kylleng ka jylla naduh ki artificial football turfs, natural football grounds, synthetic athletic tracks bad ki multipurpose indoor hall bad yn sa pyniar shuh shuh iaka STAR Program khnang bay n lah ban kynthup shuh shuh ia ki nongialehkai, ban bteng ban pynkiew iaka jingai jingiarap bad jingkyrshan bad ban kyntiew ruh ha kaba iadei bad ka kam ai jinghikai.
“Nga ai khublei ia u Myntri Rangbah ka jylla halor ka jingiohi jngai ka jong u kum u nongialam, ka tnad Sports & Youth Affairs bad ki nongshong shnong ka Tura, ki bor pyniaid district, MSOA bad ki Sports Associations halor ka jingnoh ia u synniang ba kordor u jongki. Ban pynlong ia ka Games ha ka sien kaba nyngkong ha Tura ka long kaei kaei kaban sah jingkynmaw” ong u Myntri Sorkar.
Nalor kane, ula kitbok ruh iaka Jowai kaban pynkhreh ban pynlong iaka Meghalaya Games kaban wan.
Ha kane ka jingpynhap pyrda iaka Meghalaya Games, la iashimbynta da ki nongialehkai ha ka jingiaid parade bad la pynlong ruh iaka prokram kaba kyrpang ha ka jingrakhe ia ka Meghalaya Day ia ka jingdap 52 snem jong ka jylla Meghalaya.
Hadien kane, la pynbud ia ki jingpyni sap na ki nongialehkai Yoga bad Wushu bad la pynshongshit bad pynbyrngia da ka Haystack Ladies, Riprap, DJ bad ka Fireworks kum ka dak jong ka jingpynkut ia ka Meghalaya Games
