Shillong Kyllalyngkot 20: Ka Shillong Lajong kala mad biang ia ka jingrem haka jingiakhun kaba khatduh ha ka Kalinga Super Cup kaba la long hynne ka Sngi Saitjaiñ ha Kalinga Stadium, Pitch 1, Bhubaneswar ha kaba ka Jamshedpur kala pynrem ia ka Shillong Lajong da 2-0.
Ka jingiakhun naduh kaba sdang kala long kaba iakhiad hynrei dei ha ka minit kaba 45 ha kaba ka Jamshedpur kala lah ban tam shi kol lyngba u Mohammed Sanan bad naduh ka khyllipmat ka Jamshedpur kala tam das hi kol ia ka Lajong.
Ha ka kylla miet ka Jamshedpur kala ioh shut ia ka Penalty ha ka minit kaba 52 hynrei u Seminglen Doungel ym shim la lah ban thep ia ka bol shapoh kol hynrei ka bol kala leit dei beit ha ka diengkol.
Ka Jamshedpur kala ioh ban thep ia ka kol kaba ar ha ka minit 73 lyngba u Thongkhosem Haokip bad kala pynkut iaka jingiakhun da kaba ioh khur syndon 3 point.
Ka Lajong mynta kan hap ban pynleit jingmut noh ha ka jingiakhun iaka I-League, kaban sdang naduh ka 3 tarik u Rymphang bad kan hap iakhun pyrshah iaka Inter Kashi ha SSA Stadium,Shillong.
