Tura, K’lyngkot 18 – Ka long ka khubor kaba sngewtynnad bad kabaai mynsiem ha kaba ka Kong Marbarisha M Pdah 44 snem ka rta, ryngkat bad ka khun kynthei ka jongka ka Toiaibha M Pdah 24 snem ka rta, kila iashimbynta lang ha ka Senior Women’s Category ha ka jingiakob iasiat ba 10m & 50m Rifle bad ha ka 10m & 25m Pistol.
Kine baroh arngut kidei na East Khasi Hills, bad kine ki shi kmie shi khun kila pyni iaka jingkhlain jong ka jingtehsong haka iing bad ha ka jingdon ia ka jingangnud ban beh ia ka thong kaba ki don.
Kane baroh kala sdang haba ka kong Marbarisha kala shah ktah na ka jingsngewtynnad ka khun jong ka ha ka kam iasiat bad kumta ka ju leit ban synran bad ai mynsiem ia la ka khun Toiaibha ha ka jingiashimbynta ha ki lympung iakob iasiat bad kane kala pynlong ia ka Toiaibha ban skhem ka jingmut jingpyrkhat haba ka iashimbynta ha ki jingiakob.
Ha ka jingsakhi iala ka khun ba kala kiew ha ka kam ialehkai hapoh ka jylla, kala pynlong ruh iaka Kong Marbarisha ban kyndeh ka mynsiem bad kala sdang iaka lynnong kaba thymmai ha ka jingim ka jongka.
“Haba peit ia ka Toiaibha kaba don ia ka jingangnud bad kaba trei met bad mynsiem bad ia ka sap kaba ka don, kumta kala pynrhem iaka ding hapoh ka jong nga. Nga la sngew ba kam long kaba slem than ban pynurlong iala ka jingangnud” ong ka Kong Marbarisha, haba iakren hadien ka jingiashimbynta ha ka Meghalaya Games.
“Ka Meghalaya Games kala long kaa rynsan bad ka kabu kaba biang tam ia ngi ban iashimbynta lang bad ban ioh ban khur ia kanam bad burom na ka bynta ka jylla jong ngi” kala ong.
Katba ka Toiaibha, kala ong “Ku mka khynnah skul, kala long ka dkhot jong ka NCC bad dei hangne ba kala sdang ban sngewthuh shai iaka jingthrang ka jongka ha ka kam iasiat. I Mei i ju pynshlur ia nga ban leit iashimbynta haki NCC Camp bad ai mynsiem ban pynurlong ia ka thong kaba nga don ha ka kam iasiat. Ha u 2016, nga la ioh ia ka phone call na ka paralok kaba la iawer ia nga ban rung dkhot ha ka Shooting Association. Kadei ka jingangnud jong I mei iba kwah ban iohi ia nga ba ngan long ka nongialehkai bad I ju wan synran ia nga haba nga leit praktis ha Assam Rifles, Happy Valley, Shillong, ka jaka kaba don ka coaching center.
“Ha kaba nyngkong i mei im shym la pdiang ban rung dokhot namar ka rta ka jongi, hynrei in wan ban synranlang ia nga haba nga leit iashimbynta ha ka State/National Championship, bad kane kala nang ai mynsiem shuh shuh ia nga” ong ka Toiaibha.
Ka Toiaibha kala iathuh ba “Hadien kumba 4 snem, katba ngi dang iasiat, I mei ila rung kum ka dkhot ba pura jong ka shooting association. Hadien katei, ila pynpaw iaka jingthrang ban long ka nongialehkai ha ka jingiasiat. Da ka jingiarap ka Bala (Instructor), ila jied ban ioh jinghika iha ka 10-meter air rifle bad hadien shisnem jong ka jingioh jinghikai, ila iashimbyta ha ka 4th Meghalaya Games. Naduh katei ka por hi, la sdang ban iashimbynta ha ki jingiakob ki bapher bapher bad ban ia ai mynsiem mar kylliang”.
Ka 5th Meghalaya Games ka dang iaid shakhmat bad kadei ha ka sien kaba nyngkong eh bala pynlong ha Tura naduh ka 15 tarik u Kyllalyngkot ha kaba yn sa iohi iaka jingiahsimbynta lang jong kine ki shi kmie shi khun haka jingiakob iasiat Rifle bad Pistol.
Kane ka longing kala kylla long kum ka nuksa ia kiba bun ki jaidbynriew ha kylleng jong ka jylla, da kaba banjur ia ka jingkongsan ban ai mynsiem bad ban iadonlang ha kaban kyntiew iwei ia iwei pat. Kane ka khana ka jongki ka long ka jingskhem jingmut, ka jingkyrshan jongka longing bad ka jingdon lang iaka mynsiem ban pynurlong iaka jingangnud ban long ki nongialehkai kiba tbit khlem da niew iala ka snem ne ka rta.
