Tura, K’lyngkot 15 : Ka President ka Ri Droupadi Murmu, hynne ka sngi Nyngkong, kala plie paidbah ia ka 5th Meghalaya Gamrs 2024 ha PA Sangma Stadium, Tura, West Garo Hills haba pynpaw ia ka jingdonkam kyrkieh ban kyrshan ia ka sap ialehkai na ki jaka ki paid riewlum bad ban saindur ia ki ba kin long ki khlur ialehkai ka Ri.
Ia kane ka lympung ialehkai la plie ha ka jingiadon ryngkat u Lat ka Jylla Phagu Chauhan, u Myntri Rangbah ka Jylla Conrad K Sangma, ka MP ka Tura Agatha K Sangma, u Myntri kam ialehkai Bah Shakliar Warjri bad kiwei kiwei ki Myntri Sorkar nalor ki Heh Ophisar ka Jylla.
Ka 5th Meghalaya Games ka dei ruh ka ban sah khana ha ka histori ka Jylla halor kiba bun ki daw namar ka dei ka sien ba nyngkong eh ban pynlong ha Tura, ka sien ba nyngkong ba pynlong shabar ka Shillong, ka sien ba nyngkong ba kynthup lang ia ki jingialehkai nala tynrai bad ka sien ba nyngkong ba ka President ka Ri, kan wan ban plie ia ka.
Haba ai jingkren hakhmat ki nongialehkai bad ki Official, ka President Murmu kala kubur ia ka jingriewspah jong ka thain Shatei Lam Mihngi ha ki kam ban kyntiew ia ki kam ialehkai bad ki nongialehkai da kaba kdew ia ka jingieid jingialehkai bad ka jingdon sap jong ki paid riewlum ka thain ha kiba bun ki jingialehkai.
“Ka don ka jingdawa ba kyrkieh ban kyrshan ia ka sap na ki jaka jong ki paid riewlum bad ban hikai pyntbit ia ki ba kin long ki khlur ialehkai. Nga sngewkmen ban iohi ba ka imlang sahlang ka thain Shatei Lam MIhngi ka pynshlur ia ki kynthei ba kin ialehkai bad shimkhia ia ki jingialehkai kum ka kam. Ka Thain Shatei Lam Mihngi kala pynmih ia shibun ki thei ialehkai kiba kynsai. Nga kwah ban kdew hangne ba ka thain ka don ia ka spah mariang kaba lah ban kyntiew ia ka Adventure Sports bad Adventure Tourism bad ba donkam ban buhkhmat ha kaban thaw ia ki lad ki lynti ban leh eiei halor kane ka bynta” kala ong.
Kala kdew ruh ba ka thain kala pynmih ia shibun ki khlur ialehkai kiba la noh synniang shibun ia ka Ri India ha ka jingioh takma ha ki lympung ialehkai ka pyrthei kum ka Olympics bad Commonweath Games. Kala pynkynmaw ba dang ha ka taiew bala lah, kala ai ia ka Arjuna Award sha ka thei ialehkai hockey Sushila Chanu Pukhrambam bad nongialehkai Wushu Naorem Roshibina Devi ha ka jingialang kaba long ha Rashtrapati Bhavan.
Ka 5th Meghalaya Games 2024 kan sakhi ia ka jingiashimbynta jan kumba 3000 ngut ki nongialehkai ki ban iakhun ha ki 23 tylli ki jait jingialehkai, ki ban long ha ki 16 tylli ki jaka ialehkai ha Tura, ha kine ki hynriew sngi.
Shuwa kane, u Myntri Rangbah ka Jylla Conrad K Sangma ula pynbna ia kane ka sngi kum ka sngi sah khana. Ula ong ba kane ka lympung kam dei tang ka lympung ialehkai hynrei ka dei ka lawei jong kane ka pateng bad ki samla kiba dang khie dang san bad ka dei ka lympung kaba kit jingmut bad kaba kongsan bha ha ka histori jong ka Jylla.
Haba kren halor ki jingpynleit jingmut jong ka Sorkar, ula ong “Kumba ka Sorkar Jylla, ngi la kren shai bha ha ka thong bad ka lynti jam ban pynthikna ba ngi khein kor ia ka spah ba ngi don, kata ki samla ka Jylla bad ki samla jong ka Ri. Ngi ngeit ban kynshew ha ki samla jong ngi, ha kaban pynthikna ba kin pyndonkam ia ka bor ka sor ha ka lynti kaba dei”.
Haba pdiang sngewbha ia ka President, ka kurim u Myntri Rangbah ka Jylla ka Mehtab Sangma, kala ai jingai sngewbha ba kynthup ia ka souvenir ka lympung ialehkai, ka Dakmanda, ka Eri Silk Saree bala thain hi da ki nongthain jain ka Ri-lum Garo.
