Shillong, Kyllalyngkot 12: U Myntri ka Sorkar Pdeng ba khmih ia ka Ports, Shipping & Waterways bad Ayush, Sarbananda Sonowal, hynne ka sngi Thohdieng u Myntri ka Sorkar Pdeng u Sarbananda Sonowal ula plie paidbah ia ki 4 tylli ki projek kiba kongsan ban kyntiew ia ka jingsmar AYUSH hapoh ka thain Shatei Lam Mihngi.
U Sonowal ula plie iaka Panchakarma Block kaba dei kaba nyngkong eh ha ka thaiñ, ka Pharmacology bad Biochemistry Lab kaba paka katkum kane ka juk kaba mynta na ka bynta ka Ayush ha ka jingialang kaba la long ha Central Ayurveda Research Institute (CARI) ha Guwahati.
Nalor kane u Sonowal ula buh ruh ia u mawnongrim ban tei iaka Campus kaba pura jongka Regional Research Institute for Homoeopathy (RRIH) bad jongka Integrated Ayush Wellness Centre ha Azara.
U Sonowal ula banjur iaka jingdonkam ban kyntiew iaka jingai jingsumar tynrai sha ka jingai jngsumar kaba katkum kane ka juk stad kaba mynta, da ka jingthmu ban kyntiew iaka met bad iaka bor jingmut jingpyrkhat jong ka thaiñ bad ka jingshim iaka sienjam ban don iaka Panchakarma block bad Ayush laboratory ka long kaba kongsan bha ha kaban pynkhlain iaka jingai jingsumar jong ka Ayush ha ka jylla Assam bad ha ka thain shatei lam mihngi baroh kawei.
Ka Integrated Ayush Wellness Centre kadei ka Centre kaba nyngkong tam hapoh ka ri.
Haba kren ha ka jingialang, u Sonowal ula ong “hapoh ka jingialam u Myntri Rangbahduh ka ri u Narendra Modi, la pynkylla ia ka rukom ai jingsumar tynrai khnang ba yn pynkhlain shuh shuh ia ka jingai jingsumar hapoh ka ri”.
“La sakhi iaka jingseisoh jong ka jinglah ban pynkhiah lyngba ka jingai jingsumar kum ka Ayurveda, Yoga, Unani, Siddha, Homoeopathy, Naturopathy bad Sowa Rigpa, kumta ka long kaba donkam ba kine ki rukomai jingsumar kiba naduh hyndai hynthai dei ban pynrung lang ha kane ka juk ai jingsumar kaba mynta” ula ong.
U Sonowal ula ong, ba kane ka n iarap shibun ha kaban pynkhlain shuh shuh ia ka rukom ai jingsumar bad ka jingai dawai dashin kaban pynkhiah ia ka met ka phad bad ia ka bor jingmut jingpyrkhat baroh.
Ula ong ba kane ka Panchakarma Block kaba thymmai bad ka Laboratory kaba paka jong ka Ayush kidei ki sienjam kiban iarap ban kyntiew ia ka jingai jingsumar lyngba ka Ayush ha ka thaiñ bad kane kan ai jingmyntoi shibun eh iaki nongshong shnong ka Assam bad ia ki paidbah ka thain shatei lam mihngi baroh kawei.
Kumban shu pynkynmaw, 2 snem mynshwa, u Sonowal ha ka 12 tarik u Rymphang 2022 ula buh ia u mawnongrim ban tei iaka ‘Panchakarma Block’ bad ka ‘Pharmacology & Bio Chemistry Labs’ da ka jingthmu ban kyntiew iaka Central Ayurveda Research Institute (CARI) kaba don ha Guwahati.
