Nongstoin, K’lyngkot 12 : Ka dongmusa jong ka Meghalaya Games 2024, kala poi hynne ka sngi Thohdieng ha Nongstoin, West Khasi Hills.
U State Ambassador ka Meghalaya Games Bah Benningstar Lyngkhoi ula pynpoi ia kane ka dongmusa kaba la ia pdiang sngewbha ha Anderson Higher Secondary School da u Deputy Commissioner ka District Bah Garod LSN Dykes, uba dei u Chairman ka Coordination Committee ka West Khasi Hills.
Hadien ba shimti ia ka dongmusa, u Deputy Commissioner ula aiti ia ka ha u kapten ka kynhun ialehkai ka West Khasi Hills ka ban leit iashimbynta ha ka lympung, ka ban sdang naduh ka 15 tarik Kyllalyngkot ha Tura
Na kane ka skul, ki kynhun ialehkai bapher bapher ka West Khasi Hills kila iashimbynta ha ka jingiaid kjat haduh NRL Petrol Pump ban iabud ia ka dongmusa hashuwa ban aiti biang ia ka sha u State Ambassador u ban mih na Nongstoin ban leit sha East Garo Hills.
