Guwahati, K’lyngkot 05 : Ka Sorkar Assam kala sdang ban pynlong ia ka soci-economic survey ban ithuh ia ki jaka kiba shong ba sah da ki Muslim trai Jylla ha Assam.
U nongai khubor ula leit ban iuhkjat sha ki katto katne ki shnong kiba don ha ki jaka kyndong ka Kamrup District ban wad ba haduh katno ka iapher ka jingpynithuh ia ki Muslim Assam haba ianujor bad ki Muslim kiba dei na Bangladesh.
Kum ka nuksa, ka Shnong Futuri ha Kamrup Rural District, ka pyni ia ki kynthei kiba phong ia ki Mekhela Sador nala tynrai (jain kynthei). Ki pyni haduh katno ka jingpher ka kolshor jong ki Goria Muslim bad kumno ki iapher bad ki Muslim kiba dei na Bangladesh lane kiba dei na East Pakistan kaba mynshuwa.
Ki nongshongshnong ki pyntip ba ki Muslim Assam kila shah ktah jur eh bad kila rai ban nym ailad shuh iano iano ruh kiba wan na Bangladesh ba kin thied jaka hapoh ka Shnong.
Ki nongshongshnong kila pynkhreh ruh ia ka jingrakhe Bihu ha ka 13 tarik Kyllalyngkot, kaba ju rakhe ruh da ki Hindu.
Ki Muslim trai jylla kila kynnoh ba dei namar ka jingwan rung kyrthep ki Muslim na Bangla, kila kylla long langknia ba jur eh namar kine ki Muslim na Bangladesh kila thombor ia ki la ha ka kolshor ne ka synshar khadar.
U Chairman ka Goria Council ula kynnoh ia ka jingsynshar ka Congress ba ai jaka sah ha ki mynder bad ai khublei ia u Myntri Rangbah ka Assam ba mynta ba u shim ia ka sienjam ban pynithuh noh ia ki Muslim trai jylla.
Ha kajuh ka por, ka sain pyrthei kala tawiar sawdong ia kane ka kam da ka jingmih kum ka AIUDF bad ka Congress kaba buh dak jingkylli ia ka Sorkar Assam.
Ka AIUDF kala ong ba ka Sorkar kala pyrshang ban pyrrkhing ia ki paid Muslim katba ka Congress kala pynpaw ba dei ban lum khana samari ia baroh ki Muslim ym tang ia ki 5 Jaidbynriew.
Kat kum ka khana samara 2011, palat 34 % ki nongshongshnong ka Assam ki dei ki Muslim. Na ka Jylla kaba don 31 million ngut, palat 10 million ki dei ki muslim.
