Shillong, K’lyngkot 03 : Ka North-East Petroleum Mazdoor Union (NEPMU) kala rai ban boycott ne sangeh kit bad leit pynhap umphniang petrol bad diesel sha baroh ki petrol pump bad ki LPG Bottling Plant.
Kane ka boycott kan treikam 48 kynta naduh ka por 5 baje mynstep jong ka 5 tarik haduh ka 5 baje mynstep jong ka 7 tarik Kyllalyngkot.
Ka NEPMU kala shim ia kane ka rai ha ka jingialang jong ka Joint Platform of Motor Sramik Union of Assam kynthup ka North East kaba long hynnin ka sngi Ba-ar ha Guwahati.
Ka NEPMU kala phah ia kane ka rai kum ka jingpyntip sha ka kompani Indian Oil Corporation Limited, Bharat Petroleum Corporation Limited bad sha ka Hindustan Petroleum Corporation Limited.
Ia kane ka rai la shim ban pyrshah ia ka rai jong ka Sorkar India ban pynkylla ia ka Motor Vehicle Act dang shen ha Iingdorbar Parliament kaba long pyrshah ia ki nongniah kali kit umphniang.
La ong ba kat kum kane ka ain, lada don kino kino ki jingjia aksiden, ki nongniah kin ngat ha ka kuna kaba heh nalor ka jingshong along ba kot haduh 10 snem.
Ka NEPMU kala dawa ia ka Sorkar India ban pynduh noh mardor ia kane ka ain haba dawa ia ka jingshngain jong ki nongniah kali.
