Guwahati, K’lyngkot 04: Ka Janata Dal United (JDU) kala pynbna ia u kyrtong iakhun elekshon Lok Sabha na Arunachal Pradesh ha ka sngi Balang khlem da iasyllok lang ia ki paralok kiba don ha ka kynhun synrop INDIA.
Ka JDU kala rai ba u President ka Party ha Arunachal Ruhi Tangung, un dei u kyrtong na ka Arunachal Pradesh (West) Parliamentary constituency ha ka elekshon Lok Sabha 2024.
Kane ka jingleh jong ka JDU kala pynbitar ia ki paralok ba iatreilang ha ka INDIA namar kam shym la don satia ka jingiakren shuwa ban pynbna ia ka kyrteng u kyrtong.
Kane ka jingpynbna kala mih ha ka por ba u National President ka JDU bad Myntri Rangbah ka Bihar Nitish Kumar, ula kiar ia ka Congress ban iakren kham bha halor kane ka kynhun synrop ka liang pyrshah.
Ka JDU kan iakhun ha ka sien ba nyngkong eh ia ka elekshon Lok Sabha na Arunchal Pradesh. Kala iakhun ia ka elekshon Assembly ha u 2019 bad jop haduh 7 seat na ka 60 seat.
Hynrei baroh kine ki kyrtong kila shah thied ha ka BJP, kaba don ha ka bor bad ba ialam da u Pema Khandu kum u Myntri Rangbah.
