Shillong, Naitung 26 :Ka Sorkar Jylla hynne ka sngi ba-ar, kala rai ban thungkam pura (regularized) noh kum ki Nonghikai Sorkar ia ki 2447 ngut ki Nonghikai Lower Primary School ka Jylla.
Haba pyntip ia kane hadien jong ka jingialang ka kynhun Myntri, u Myntri Rangbah ka Jylla Conrad Kongkal Sangma ula ong “Ngi la rai ban thungkam pura noh kum ki nonghikai ka Sorkar ia 2447 ngut ki nonghikai bad mynta kine kin ioh ia ki jingmyntoi kaba ki dei ban ioh kum ki Nongtrei ba pura ka Sorkar”.
U Myntri Rangbah ula ong ba kane ka dei ka jingdawa kaba la slem bha jong ki Nonghikai.
When the State Govt. took over the LP schools in 1993, a large number of teachers became regular Govt. employees and in the process, almost 2447 teachers were left out for regularisation.
— Conrad Sangma (@SangmaConrad) July 26, 2022
U Conrad ula iathuh ba ha ka por ba ka Sorkar Jylla kala shimti ia ki skul Lower Primary ha u snem 1993, bun ngut ki Nonghikai kila shah pynkynriah sha ka Sorkar bad kila long ki nongtrei ba pura ka Sorkar.
Hynrei ha kane ka jingpynkynriah, 2447 ngut ki Nonghikai kila shah ieh bad dei namar kata ba kim shym la ioh satia ia ka bai bam tynmen bad ka ACPS. “Kane kala jia na kiba bun ki daw bad ngam kwah than ban batai ia kiei kiei baroh” ula bynrap.
Haba kylli, u Conrad ula ong ba ka jingsiew hi kan long beit tang ia ka bai bam tynmen namar ki dei kiba ioh ia ka tulop kumba ioh kiwei pat ki nonghikai.
U Conrad ula pyntip ba ha ka por ba ka Sorkar ka shimti ia ki 2568 tylli ki skul jong ki District Council, haduh 136 tylli ki skul kila shah ieh shadien bad khlem shimti satia da ka Sorkar Jylla.
