Nongpoh, Naitung 26: Ka surok 4 lane ha National Highway-6 kaba don ha ki thain Umling, kala shlei um biang hynne ka sngi ba-ar na ka jingther u slap, kaba la ktah jur ia ka leit ka wan jong ki kali bad ki paidbah kiba iaid ba wan na kane ka surok.
Kane ka jingshlei um kala jia ha ki bynta jong ka shnong Umling pyrshah ia ka Covid-19 Screening Centre bad kane ka jingshlei um kala jia tang namar ka jingbym biang jong ka nala tuid um ha kane ka surok. Ka jingshlei um ha kane ka bynta jong ka surok ka dei kaba ju jia manla ka por haba jur ka jinghap slap.
Kaba thamula ka long ba kane ka jingshlei um kala jia tang na ka jinghap slap uba neh kumba katto katne por ha kane ka thain. Kane ka jingshlei um ka surok kala wanrah ruh ia ka jingdheng kali ha ka thain khamtam ki kali rit ki bym long shuh ban niom ha kaba jam na shiliang sha shiliang.
Ki nongleit nongwan hi kila kynnoh ia ka National Highway Authority of India ka bym shym la shna ia ki nala kiba biang ban tuid um ha kane ka surok 4 lane wat hapdeng ki jingud, jingujor na ka por sha ka por.
