Pyrshah ka HNLC ban khangdam noh ia ka MCCL, byrngem pyniap ia u MLA ka Sohra lada um iehnohkam

Tyrwa siew tulop ba T.25,000 sha ki Nongtrei ban wan pyniasoh sha ka Seng

Shillong, Nohprah 29 : Ka seng Hynniewtrep National Liberation Council (HNLC) ha ka sngi Thohdieng, kala pyrshah ia ka jingthmu jong ka Sorkar Jylla ban khangdam noh ia ka Mawmluh Cherra Cement Limited (MCCL) haba dawa ia u MLA ka NPP na Sohra Bah Gavin M Mylliemngap ban shim ia ka jingkitkhlieh da kaba iehnohkam kum u MLA ka thain lem kumta ka seng kan leh eiei pyrshah ia u.

Ha kajuh ka por, ka HNLC kala tyrwa ban ai jingiarap ia ki nongtrei ka MCCL da kaba siew ia ka tulop ba manla u bnai, kaba long haduh T. 25,000 lada ki iasnohkti lang ha ka jingialeh jong ka seng.

Kane ka jingkynthoh ka HNLC kala wan ruh ha ka por ba ka jingiakren iasuk hapdeng ka Sorkar Pdeng, ka Sorkar Jylla bad ka HNLC ka dang iaid shakhmat.

“Lad aka Sorkar ka jam sahkhmat bad ka jingkhangdam ia ka MCCL, kan bha shibun ia u MLA ka Sohra Gavin ban shim ia ka jingbahkhlieh. Ha ka jingshisha, u dei ban iehnoh ia ka kam kum u MLA” ong u General Secretary cum Publicity Secretary ka HNLC Bah Sainkupar Nongtraw ha ka kyrwoh.

Ula maham ruh “Lada u (Gavin) kyntiat ban hiar shuki, ka HNLC kan pynbahkhlieh ha u. Kumba ma phi bad ka Sorkar jong phi ki nud ban tep im ia ka MCCL, ngi tynrong ia ka jingbahkhlieh ha phi da ki kam ba phi la leh. Ki nongshet kylla ia u paidbah ki dei ban ioh ia ka jingpynsajia da ka jingiap”.

Une u Nongalam ka HNLC ula ong ruh “Ia mynta, ngim iohi satia ban don kano kano ka lad kaba biang. Kumta, ka HNLC ka kwah ban buh ia ka jingtyrwa sha ki nongtrei jong ka karkhana : lada phi kloi ban iasnohkti bad ki jingialeh jong ngi, ngin ai ia ki da ka tulop ba man u bnai kaba long T. 25,000. Kiba lah ban iasnohkti ki dei ban long hapoh 45 snem ka rta bad kin hap ban leit hikai pyntbit kum ki shipai. Lada ki pyni ia ka jingkut jingmut ban iakit lem ia ka jingialehkai jong ngi, ngi lah ban mynjur ha kaban tyrwa ia ka tulop kaba kham biang”.

Nalor kane, u Bah Sainkupar ula ong ba ka jingbyrngem jong ka Sorkar Jylla ban khangdam noh shisyndon ia ka MCCL ka dei tang ka buit ban pynkylla ia ka lynti na ka bynta kiwei pat ki kam.

“Ka HNLC ka pynrem jur ia kane ka jingthmu ba sniew jong ka Sorkar naba kan ieh khlem kam ia ki nongshongshnong ka Sohra bad ieh ia ki ha ka jingshimkabu ki khwai myntoi. Ha ka jaka ban khein kongsan ia ka jingpynjanai ia ka MCCL, ka jingthmu ka Sorkar ka long ban khangdom noh bad ka ialeh ban kyntiew pynban ia ka roi ka par ki karkhana dewbilat ba long trai da ki bar jyla na kiawei ki Jylla” ula ong.