Nongpoh, Nohprah 20: Ban pynrhem ia ka mynsiem lehkmen ia ka Khristmas, ka Khasi Student Union (KSU), Nongpoh Circle hynne ka sngi Balang, kala pynlong ia ka jingrakhe Pre Christmas bad ki heprit kiba shong basah hapoh ka jaka ri khunswet jong ka Ri Bhoi Synod Orphanage Home kaba don ha Mawsyntai.
Ka KSU hapoh ka jingialam u President samla John Lyngdoh, ka la ai sngewbha ruh da ki jain kup syaid bad ban ot ruh ia ka cake ban ialehkmen lang ia ka jingwan long briew u Trai Jisu bad kine ki heprit.
U Samla John Lyngdoh, u la pynpaw, ba kum ki nongialam ka KSU kiba don ia ka jingkitkhlieh ban peit ia ka imlang ka sahlang, ki la shim da kane ka sienjam kaba kyrpang ban leit ai mynsiem ia ki heprit kiba shong basah ha ki jaka ri khunswet kaba la peit la khmih da ka Balang Presbyterian.
Une u Nongialam ka KSU, u la ai ruh ia ka jingiaroh ia ki nongtrei jong kane ka jaka ri khunswet kiba khlem shongthait ban ai ia ka jingieid bad ban peit ban khmih ia ki heprit ha ryngkat ka jingai jinghikai ruh ia ka ktien u Blei.
“Ai ba kane ka Khristmas kan long kaba kmen bad kaba dap da ki jingkyrkhu kiba kyrhai ha ryngkat ka jingbtien lynti u Blei Trai Kynrad ia ki heprit ba kin ioh ruh ia ka met kaba koit kaba khiah bad ba kin heh kin san ha ka jingtip briew tip Blei”, ong u samla John Nongrum.
