Shillong, Nohprah 19: Ka Dorbar Shnong Puriang hynne ka sngi kala pynkupburom iaki 20 ngut ki khynnah bad samla pule kiba la wan hakhmat haki eksamin bapher bapher jong u snem 2023.
Ia kine ki khynnah la pynkup burom da u chief executive member (CEM) ka Khasi Hills Autonomous District Council (KHADC) u Bah Pyniaid Sing Syiem haka jingdon lang u Sordar ka Puriang, Rangbah Shnong, ki Secretary Shnong, longkmie, ki khynnah skul bad ki nong shong shnong.
Ha kane ka sngi naka liang u CEM ula plie ruh iaka Laboratory jong ka Puriang Secondary School bad iaka ka ingdorbar jong ka Dorbar Shnong Puriang.
Haba kren ha kane ka sngi u Bah Pyniaid ula ong ba kane ka jingpynkupburom iaki khynnah kan nang ai mynsiem iaki ban nang trei shitom ban poi sha ka thong khamtam haka liang ka pule puthi.
U Bah Pyniaid ula ong ba kane ka sienjam ba shim daka Dorbar Shnong kan ai mynsiem sa kiwei ki khynnah bad ula kyntu ruh iaki kmie ki kpa ban pynshlur iala ki khun ban pule halor ka Rep ka Riang namar ka Meghalaya ka dang dei ka Jylla kaba im naka rep ka riang.
Ula ong ba man u snem ki don palat 60,000 hajar ngut ki samla kiba lait iaki eksamin bapher bapher hynrei ki kam Sorkar ki don tang 2000 bad dei namar kane ka Sorkar kam lah ban shu ai kam Sorkar lut ia baroh.
“Ka Sorkar Jylla haka jingialam da u Myntri Rangbah ka Jylla u Conrad K Sangma kala pynmih shibun ki program bad ki skhim ki ban iarap iaki samla ka Jylla ban sengkam lajong bad haka juh ka por ban aikam iala ki para samla hala ki jong ki Shnong” la ong u Bah Pyniaid.
