Shillong, Nohprah 19: U Bah Shemstar Rynjah naka shnong Lawsohtun Block 6 hynne ka sngi Ba-ar, ula pynbna ban iakhun haka ilekshon MDC 2024 kum u kyrtong shimet na Laban Constituency.
Haba pynbna ia kane u Bah Shemstar ula ong ba rai ban mih iakhun haka ilekshon MDC 2024 kadei namar u kwah ban iarap iaki ba duk khamtam kum ha kane ka por ba kyrduh kam.
U Bah Shemstar ula ong ba kum u rangbah u sngewkhia halor ka jingeh ka jaidbynriew khamtam haba iadei bad ka jingshah kyntur pud ki trai Ri trai muluk kiba don ha ki thain khappud.
Ka jingthmu ban iakhun iaka MDC ilekshon 2024 kadei namar nga la iohi iohi ia ka jingeh ba ki paidbah ki ia kynduh na ka por sha ka por khamtam haba iadei bad ka jingban ka jingduk, ka jingkyrduh kam ki khun samla, ka jingiaumsnam bad ka jingshah kyntur pud na ka por sha ka por bad kiwei kiwei de ki mat ba ktah iaka bha ka miat ki paidbah bad ka Jylla baroh kawei” la ong u Bah Shemstar.
U Bah Shemstar ula ong ruh ba u ieng ban iakhun haka ilekshon MDC 2024 naka bynta ban iakren halor ka jingkhapngiah ka sor Shillong bad ka jingeh ba ki Dribar kali kamai ki ia kynduh.
