Shillong, Nohprah 19: Ki nongtrei ka tnat PHE hapoh ka shatri Mawphlang PHE Worker Union (MPWU) hynne ka sngi Ba-ar, kala dawa naka Sorkar Jylla ba kan pyllait noh iaka tulop jong ki, kaba sahkut mynta ka 3 bnai.
Haba kren sha ki lad pathai khubor u President ka MPWU ah Napoleon S Mawphniang ula iathuh ba ki nongtrei Casual bad Muster Roll kiba trei hapoh ka tnat PHE kim pat ioh tulop naduh u bnai Risaw, Naiwieng bad Nohprah 2023.
U Bah Napoleon u iathuh ba naka liang ka seng kila dep thoh sha u Myntri ka tnat PHE Marcuise N Marak bad sha ki Ophisar ka tnat halor ka jingshah set tulop hynrei haduh mynta ka Sorkar kam pat phah ktien eiei halor ka jingkyrpad jong ki.
“Kum ki nongtrei Casual bad Muster Roll kiba ioh duna ka tulop, ka Sorkar ka dei ban pyrkhat iaka jingdonkam ki nongtrei khamtam mynta ka kynti ba dei ka aiom Christmas bad dei namar kane ngi dawa naka Sorkar ba kan pyllait noh iaka tulop jong u Risaw, Naiwieng bad ka Advance tulop jong u bnai Nohprah” ong u Bah Napoleon.
U Bah Napoleon ula iathuh ba haka 24 tarik Naiwieng kila kynduh ia u Myntri ka tnat PHE halor ka tulop hynrei naka liang u Myntri u khlem ai kano kano ka jingkular hynrei ula ong, baka tnat kan sa pyrshang.
“Kane ka jingong u Myntri ka wanrah jingeh ia ngi ki nongtrei namar ba mynta la jan ka Christmas kumta ngi kyntu ia ka Sorkar ba kan pynlait noh ka tulop ha shwa ka jingrakhe Christmas” ula ong.
