Aizawl, Naitung 26 : Ka kashari ha Mizoram hynnin ka sngi Nyngkong ka la rai pynrem da ka ba set phatok shi snem kynthih pyrshah ia u MLA ba marwei ka BJP u Buddha Dhan Chakma lem bad ki12 ngut kiwei pat nalor ka kuna ka ba T.10,000 namar ka jingdonkti ha ka kam bamsap ka ba la jia ha kine ki shiphew snem ba la dep.
Watla katta na ka liang une u nongmihkhmat ka BJP hadien ka jingpynbna ia katei ka rai u la ong ba kin leit sha ka iingbishar Gauhati High Court ban pynpaw pyrshah halor katei ka rai jong katei ka kashari jong u nongbishar ba kyrpang (Prevention of Corruption Act).
Nalor une u MLA ka BJP 49 snem rta, ki 12 ngut kiwei pat ki nongialam ka Chakma ki kynthup ia u Chief Executive Member (CEM) ka Chakma Autonomous District Council (CADC) u Buddha Lila Chakma, arngut ki Executive Member bad lai ngut ki CEM barim jong ka council.
Ka kashari ha ka sngi Thohdieng ba la lah ka la pynngat ia une u MLA lem bad ki 12 ngut ki nongialam ka Chakma hapoh ki kyndon Prevention of Corruption Act, 1988, ka la ong ba kine ki donkti ha ka ba pyndonkam bakla ia ka pisa ka ba kot sha ka T. 137.10 lak ba la mang da ka sorkar na ka bynta ki kam pynroi.
Kine ki ba la shah kynnoh donkti ki la shim ia kane ka pisa ha ka rukom jong ka tulop ka ba la ioh pdiang lypa (advance salary) khlem ka jingbit na u Lat bad ka sorkar jylla.
Ka jingpynngat ia kine ki 13 ngut ki nongialam ha kane ka kam bam sap ka dei ka ba la shim da u General Secretary ka BJP ha katei ka por bad u president jong ka party ha ka jylla u Vanlalhmuaka u ba la phah ia ka jingujor lyngba ka jingthoh sha u Lat ha ka snem 2013.
Na ka liang jong u Lat hadien ba u la ioh pdiang ia kane ka jingujor u la thung ia ka commission tohkit ba marwei bad da ka ba pynshong nongrim lyngba ka kaiphot jong ka commission, ka tnat District Council bad Minority Affairs Department ka Mizoram ka la ujor da ka FIR hapoh ka tnat Anti-Corruption Bureau (ACB) ha ka snem 2018.
Hadien ba u Vanlalhmuaka u la phah ia kane ka jingujor, ka Congress ka dang synshar hapoh CADC hapoh ka jingialam jong u B.D. Chakma kum u CEM.Hadien u Chakma u la shah jied shapoh ka assembly ka jylla na ka tiket congress bad kylla long u myntri ka jylla tad haduh ba un da iehnoh kam ha ka snem 2017 ban pynpaw pyrshah halor ka jingkyntait ban bhah ia ka medical seat na ka bynta ki sawngut ki samla pule ki ba dei ki Chakma da ka sorkar ha katei ka por hapoh ka jingialam jong u nongialam ka Congress u Lal Thanhawla.
Hadien kane u la leit pyniasoh noh ia lade bad ka BJP bad shah jied sha ka assembly ka jylla kum u kyrtong ka saffron party ha ka assembly election 2018 bad kylla long u MLA ba nyngkong ka BJP na ka thain khappud ka jylla hapoh northeast.
