Tura , Naitung 26: Ka Monica D Momin ba ju tip ruh kum ka Monica Singer namar ka jingpaw nam ka jingrwai “Tik tok, tik tok” kala shah kem ha ki Pulit ka Women Police ka Tura ban tohkit halor ka ejahar bala mudui da ki nongkhaii kiba shah kren tohmet ha kane ka briew ha kine ki khyndiat taiew bala leit noh.
Ki pulit kila leit kem ia kane ka nongrwai hynne ka step sngi ba-ar na ka iingsah kaba don ha ka shnong Chengkurigre marjan ka Tura, bad la rah ia ka sha women police station ban kylli jingkylli.
Kane ka jingshah kem ka dei namar ka jingpyndik bad kren tohmet da ki taiew ia ki nongkhaii da kane ka nongrwai bad ka kynhun jong ka, kiba la leit talasi ia ki dukan bad kurup ia ki tiar kynthup ki duma haba kam ba kim don licence ban die ia ki.
Ki don ruh ki jingujor ba ki nongkhaii kila shah pynbor ha kane ka nongrwai bad ka kynhun ba kin iasoh bad ka seng jong ki ha ryngkat ki jingbyrngem ban khang ia ki dukan lada kim iasoh bad ka seng jong ka.
La kynnoh ba ka pynbor ruh ia ki nongkhaii ban die ia ki mar ki mata lyngba u kurim jong ka ha ryngkat ka jingbyrngem ban pyrrkhing ia ka kam jong ki lada kim kohnguh ia ka.
U Lok jong ka, uba dei u kaikhkaw barim bala tip kyrteng u Nigam, ula phetrieh hadien ka jingshah kem ka monica.
