Shillong, Nohprah 13: U Myntri Rangbah ka Jylla u Conrad Kongkal Sangma ula ong, watla ka jylla kam pat ioh pyntreikam ia ka Inner Line Permit (ILP) hynrei kala shim ia ki sienjam ban iakhun ban iada ia ka jingwan rung be-aiñ ki briew kiba nabar shapoh ka jylla.
Haba iakren bad ki nongthoh khubor hynne ka sngi, u Myntri Rangbah ula ong, “Ha kaba iadei bad ka mat jong ka jingwan rung kyrthep ki briew kiba nabar, la shim ia ki sienjam kiba bun ha ki kyrdan ki bapher bapher bad kam mut ba ym shim la leh eiei, hynrei ka sorkar kala shim ia kiba bun ki lad ki lynti la kidei ki Infiltration Check Gates ne ka jingtrei jong ki tnad bapher ban lap ia kum kitei ki briew bad ban phah leit phai noh ia ki”.
“Kaei ka jingiapher hapdeng ka ILP bad ka MRSSA ka long ba ka don iaka jingthmu ban don ia ka khmih bniah iaka jingwan rung jong uno uno u briew shapoh ka jylla bad ha ka ILP yn donkam ia katei ha kaba u briew uba kwah rung yn hap ban ioh jingbit shwa, kumta kala don ka jingdawa kaba jur na ki paidbah bad da ka Resolution kaba la mynjur da ka ïingdorbar thawaiñ ba dei ban don ia ka ILP ha ka jylla Meghalaya bad ngi la kyrpad ia ka sorkar India hynrei kam shym la ai ia kano kano ka jubab kaba shai kdar bad ngi dang ap ia kane bad ngi dang bteng ban iai pynkynmaw ia ka sorkar India” ong uMyntri Rangbah.
“Katba ha ka juh ka por ka MRSSA kadei kawei pat ka lad kaba jan iasyriem kum ka ILP kaba ngi la mynjur ha ka ïingdorbar thawaiñ hynrei ym shym la ioh ia ka jingmynjur na u Lat bad la phah sha nongbah Delhi sha ka President na ka bynta ban ai ia ka jingmynjur. Hynrei hadien ka sorkar India kala pynphai noh ia ka MRSSA sha ka sorkar Meghalaya ba kadei ban khmih bniah biang bad ban pynbeit thymmai namar ba ki don ki katto katne ki bynta ki bym iahap bad ki kyndon jong ka riti synshar jong ka ri” ong u Myntri Rangbah.
Ula ong ba ka sorkar jylla kan sa khmih bniah biang bad kala sdnag ban iakren bad kiba bun kiba donbynta ha kane ka kam bad kala iakren ruh bad ka kynhun ki nongiasaid aiñ bad u Advocate General ka jylla kumno ban iaid shakhmat bad kane ka bynta.
U Myntri Rangbah ula ong ruh ba u don ia ka jingthmu ban lum ia ka jingialang bad ki kynhun bapher bad ia kane yn sa leh hadien ba la dep ban rakhe ia ka jingpdiang sngewbha ia u Snem Thymmai.
