Guwahati, Nohprah 08 : Ka Iingkashari Supreme Court ha ka sngi Palei kala ong ba ka Sorkar Pdeng ka dei ban shimkhia bha ia kaei kaba jia ha ka Jylla ba khappud ka Bangladesh namar ka jingbym tehalakam ia ka jingrung tuh ki mynder poi ei ym tang ba ka ktah ia ka jinglong ki trai shnong hynrei ka ktah ruh ia ka jingdon jingem ka Jylla.
Kane ka Iingkashari ba hakhlieh duh ka Ri kala pan ruh ia ki jingtip ba bniah halor ka Foreigner Tribunal bad ka jingpynphai pat ia ki mynder nalor ki sienjam bala shim da ka Sorkar ban leh eiei halor ka jingwan rung bein ki mynder bad kumjuh ruh ia ka jingker sainar, haba buh por la sngi Nyngkong ba kan ai jingkhein ia baroh kine kiei kiei.
Ka Iingkashari ba san ngut ki Nongbishar bala khlieh da u Chief Justice of India Dhananjaya Y Chandrachud, kala pan ruh ia ka jingkhein halor ka jingdon ki mynder poi ei ha India kynthup ym tang ha Assam, hadien ka 25 tarik Lber, 1971 ha ka por ba khie ka thma Bangladesh.
Ka Iingkashari kala bishar ia kane ka bynta haba shong bishar ia ki jingujor pyrshah ia ka jingtreikam jong ka kynhun 6A jong ka Citizenship Act.
Kane ka kyndon ka ai jingithuh nongshongshnong ia ki mynder poi ei kiba la rung bad sah ha Assam naduh ka por jong ka East Pakistan (mynta Bangladesh) hapdeng ka 1 tarik Kyllalyngkot, 1966 bad 25 tarik Lber 1971 bad la pynrung ia ka ha ka 1955 Citizenship Acru snem 1985 kum ka kyndon ba kyrpang ban leh eiie bad ka jinglong nongshongshnong ki briew kiba shah kdup hapoh ka Assam Accord-ka soskular bala iasoi da ka All Assam Students’ Union (AASU), ka Sorkar Assam bad ka Sorkar Pdeng ba ialam da u Rajiv Gandhi.
Ka jingbishar kaba sdang ha ka sngi Ba-ar, kala phaikhmat haduh mynta tang halor ka jingktah ka jingwan rung ki poi ei ha Assam. Hynrei ha ka sngi Palei, ka Iingkashari kala pyniar ia ka jingbishar sha kiwei kiwei ki mat.
